അങ്ങാടിപ്പുറം: ഓടികൊണ്ടിരിക്കുന്ന ട്രെയിനില്‍ ചാടിക്കയറാന്‍ ശ്രമിക്കുന്നതിനിടെ  വീണ് യുവാവിന് ഗുരുതര പരുക്ക്. പാലക്കാട് കുഴല്‍മന്ദം മാത്തൂരില്‍ ഷിജില്‍ബാബു (31) വിനാണ് അങ്ങാടിപ്പുറം റെയില്‍വേ സ്റ്റേഷനില്‍വച്ച് പരുക്കേറ്റത്. പരുക്കേറ്റ യുവാവിന്റെ ഇരുകാലുകളും മുറിച്ചു മാറ്റി.
ഞായറാഴ്ച വൈകിട്ട് ആറിന് നിലമ്പൂരില്‍ നിന്ന്  പാലക്കാട്ടേക്കുള്ള വണ്ടിയിലാണ് ഷിജില്‍ ചാടിക്കയറാന്‍ ശ്രമിച്ചത്. പ്ലാറ്റ്‌ഫോമില്‍ നിന്നു വെള്ളം വാങ്ങി എത്തിയപ്പോഴേക്കും വണ്ടി നീങ്ങിയതോടെ  കയറാന്‍ ശ്രമിച്ചപ്പോള്‍ പിടികിട്ടാതെ താഴെ വീഴുകയായിരുന്നു. ഉടന്‍ നാട്ടുകാരും റെയില്‍വേ അധികൃതരും  പെരിന്തല്‍മണ്ണയിലെ സ്വകാര്യ ആശുപത്രിയില്‍ എത്തിച്ചിരുന്നു.  ചികിത്സയിലിരിക്കേ ഇന്നലെയാണ്  ഇരുകാലുകളും മുറിച്ചുമാറ്റിയത്.