ന്യൂഡല്‍ഹി: ഇന്ത്യയില്‍ വാക്‌സിന്‍ വിതരണത്തിന് തയാറെടുത്തിരിക്കെ രാജ്യത്തു വകഭേദം വന്ന കൊറോണ വൈറസ് സ്ഥിരീകരിച്ചത് വാക്‌സിന്‍ വിതരണ നടപടിയെ അട്ടിമറിക്കില്ലെന്ന കണക്കുകൂട്ടലില്‍ വിദഗ്ധര്‍. വാക്‌സിന്‍ വരുന്നതോടെ കൊവിഡിനെതിരായ പോരാട്ടം വിജയത്തിലേക്കടുക്കുന്നു എന്ന പ്രതീക്ഷയിലിരിക്കെയാണ് യു.കെയില്‍ നിന്ന് കൊവിഡിന്റെ വകഭേദം കണ്ടെത്തിയതായ വാര്‍ത്തകള്‍ പുറത്തുവന്നത്. പിന്നാലെ ആറു പേര്‍ക്ക് രാജ്യത്ത് പുതിയ വൈറസ് സ്ഥിരീകരിക്കുകയും ചെയ്തു. ആറു പേരും യു.കെയില്‍ നിന്നെത്തിയവരാണ്. മൂന്നെണ്ണം ബംഗളൂരു നിംഹാന്‍സ് ലാബിലും രണ്ടെണ്ണം ഹൈദരാബാദ് സി.സി.എം.ബിയിലും ഒന്ന് പൂനെ എന്‍.ഐ.വിയിലും നടത്തിയ പരിശോധനകളിലാണ് കണ്ടെത്തിയത്. അതേ സമയം ബ്രിട്ടനില്‍ കണ്ടെത്തിയ ജനിതകമാറ്റം വന്ന കൊറോണ വൈറസ് പാകിസ്താനിലുമെത്തി. ബ്രിട്ടനില്‍ നിന്നു കറാച്ചിയിലെത്തിയ മൂന്നു പേരിലാണ് വൈറസ് കണ്ടെത്തിയത്.

പുതിയ കൊവിഡ് നിലവിലുള്ള വൈറസിനെക്കാള്‍ പകരാന്‍ 70 ശതമാനം കൂടുതല്‍ സാധ്യതയുള്ളതാണെന്നാണ് കണ്ടെത്തല്‍. പുതിയ സാഹചര്യത്തില്‍ ഡിസംബര്‍ ഒന്‍പതിനും 22നുമിടയില്‍ യു.കെയില്‍ നിന്ന് ഇന്ത്യയിലെത്തിയ എല്ലാ യാത്രക്കാരെയും കൊവിഡ് പരിശോധനയ്ക്ക് വിധേയമാക്കുമെന്നും ഇതില്‍ രോഗബാധ കണ്ടെത്തുന്നവര്‍ക്ക് ജനിതക ശ്രേണീകരണം നടത്തുമെന്നും കേന്ദ്ര ആരോഗ്യ മന്ത്രാലയം അറിയിച്ചു.

കൊറോണ വൈറസിന്റെ പുതിയ വകഭേദത്തിനെതിരേ പ്രവര്‍ത്തിക്കാന്‍ ഇപ്പോള്‍ വികസിപ്പിച്ചുകൊണ്ടിരിക്കുന്ന വാക്‌സിനുകള്‍ മതിയെന്നാണ് ശാസ്ത്രജ്ഞരുടെ അഭിപ്രായം. ആസ്ട്രാസെനെക്ക, മോഡേണ, ഫൈസര്‍ എന്നീ വികസിപ്പിച്ചെടുത്ത വാക്‌സിനുകള്‍ വകഭേദം വന്ന കൊവിഡിന്റെ സ്‌പൈക്ക് പ്രോട്ടീനെയും ലക്ഷ്യമിടുന്നു എന്നാണ് ശാസ്ത്രജ്ഞര്‍ പറയുന്നത്. കൊവിഡിന് ജനിതകമാറ്റത്തിലൂടെ ഈ വാക്‌സിനുകളില്‍ നിന്ന് രക്ഷപ്പെടാന്‍ അത്ര എളുപ്പം സാധിക്കില്ലെന്നാണ് ശാസ്ത്രജ്ഞരുടെ അഭിപ്രായം.
വൈറസുകളിലെ ജനിതകമാറ്റം ഒരു സാധാരണ സംഭവമാണെന്ന് ശാസ്ത്രജ്ഞര്‍ ചൂണ്ടിക്കാട്ടുന്നു. ജലദോഷമുണ്ടാക്കുന്ന വൈറസുകള്‍ക്കു പോലും ജനിതകമാറ്റമുണ്ടാകാറുണ്ട്. യു.കെയില്‍ കണ്ടെത്തിയ വൈറസിന്റെ വകഭേദത്തില്‍ അതിന്റെ സ്‌പൈക്ക് പ്രോട്ടീനിലാണ് മാറ്റം വന്നിട്ടുള്ളത്. സ്‌പൈക്ക് പ്രോട്ടീനുപയോഗിച്ചാണ് മനുഷ്യശരീരത്തിലേക്ക് വൈറസുകള്‍ കടന്നുചെല്ലുന്നത്. സ്‌പൈക്ക് പ്രോട്ടീനില്‍ മാറ്റം വന്നതോടെ പുതിയ വൈറസുകള്‍ക്ക് മനുഷ്യശരീരത്തില്‍ അതിവേഗം കയറിച്ചെല്ലാനും രോഗിയുടെ മൂക്കിലും തൊണ്ടയിലും കൂടുതല്‍ വൈറസുകളെ സൃഷ്ടിക്കാനും കഴിയും.

ഇതോടെ വൈറസുകള്‍ വേറെ ഇടങ്ങള്‍ അന്വേഷിക്കുകയും കൂടുതല്‍ ആളുകളിലേക്ക് വേഗത്തില്‍ പടരുകയും ചെയ്യും. പുതിയ കൊവിഡ് പഴയതിനെക്കാള്‍ 70 ശതമാനം കൂടുതല്‍ പടരുന്നതായി കണ്ടെത്തിയിട്ടുണ്ടെങ്കിലും ഇതു മാരകമല്ലെന്നാണ് ശാസ്ത്രജ്ഞര്‍ പറയുന്നത്. എന്നാല്‍, പുതിയ വകഭേദം കോവിഡ് കേസുകളുടെ എണ്ണം അതിവേഗം വര്‍ധിപ്പിക്കുകയും ഇന്ത്യ പോലെ ജനസംഖ്യ കൂടിയ രാജ്യങ്ങളിലെ ചികിത്സാ സംവിധാനം താറുമാറാക്കുകയും ചെയ്യും. മുപ്പതിനും അറുപതിനുമിടയില്‍ പ്രായമുള്ളവരിലാണ് പുതിയ വൈറസ് കൂടുതലായി ബാധിച്ചത്. മുന്‍പത്തെ വൈറസുകള്‍ കൂടുതലും പ്രായമുള്ളവരെയായിരുന്നു ബാധിച്ചിരുന്നത്.
പുതിയ വൈറസുകളെ നേരിടാന്‍ നമ്മള്‍ പ്രത്യേകം മുന്‍കരുതലുകളൊന്നും എടുക്കേണ്ടതില്ലെന്നും നേരത്തെ കൊറോണ വൈറസുകളെ എങ്ങനെയാണോ നേരിട്ടത,് അതേ മാര്‍ഗം തന്നെ പിന്‍തുടരുകയാണ് വേണ്ടതെന്നും ശാസ്ത്രജ്ഞര്‍ ചൂണ്ടിക്കാട്ടുന്നു. മാസ്‌ക് ധരിക്കുക, ഇടയ്ക്കിടയ്ക്ക് കൈ കഴുകുക, സമൂഹിക അകലം പാലിക്കുക തുടങ്ങിയ കാര്യങ്ങള്‍ തുടരണം.