കൊല്ലം: ചടയമംഗലം ഡിവിഷനംഗം സി.പി.ഐയിലെ സാം കെ. ഡാനിയല്‍ ജില്ലാ പഞ്ചായത്ത് പ്രസിഡന്റാകും. നെടുവത്തൂര്‍ ഡിവിഷനംഗം സി.പി.എമ്മിലെ അഡ്വ. സുമാ ലാലാണ് വൈസ് പ്രസിഡന്റാകുക. ആദ്യ രണ്ടുവര്‍ഷം പ്രസിഡന്റ് സ്ഥാനം സി.പി.ഐക്കും തുടര്‍ന്ന് സി.പി.എമ്മിനും ലഭിക്കും. അവസാന മൂന്നുവര്‍ഷം വൈസ് പ്രസിഡന്റ് സ്ഥാനം സി.പി.ഐക്കും ലഭിക്കും. 26 അംഗ ജില്ലാ പഞ്ചായത്തില്‍ എല്‍.ഡി.എഫ്-23 (സി.പി.എം-14,സി.പി.ഐ-09.),യു.ഡി.എഫ്-3 (കോണ്‍ഗ്രസ്-02, ആര്‍.എസ്.പി-01). എന്നിങ്ങനെയാണ് കക്ഷിനില.
കീഴ്‌വഴക്കം ലംഘിച്ച് ഭരണത്തിന്റെ ആദ്യടേം വേണമെന്ന് സി.പി.എം ആവശ്യപ്പെട്ടുവെങ്കിലും സി.പി.ഐ വഴങ്ങിയില്ല.
എന്നാല്‍ പ്രസിഡന്റ്, വൈസ് പ്രസിഡന്റ് പദവികളില്‍ രണ്ടുപാര്‍ട്ടിക്കും രണ്ടര വര്‍ഷം വീതമായിരുന്ന ഭരണകാലാവധി ഇത്തവണ സി.പി.എമ്മിന്റെ സമ്മര്‍ദത്തിന് വഴങ്ങി പ്രസിഡന്റ് പദവിയില്‍ സി.പി.ഐക്ക് രണ്ടുവര്‍ഷമാണ് ലഭിക്കുക.