ലണ്ടന്‍: ലണ്ടനില്‍ കവര്‍ച്ചക്കാരെ ഒറ്റക്ക് നേരിട്ട് ആഴ്‌സനല്‍ താരം സീഡ് കൊലാസിനാച്ച്. കഴിഞ്ഞ ദിവസമായിരുന്നു ആഴ്‌സനലിലെ സഹതാരം മെസൂട്ട് ഓസിലും കൊലാസിനാച്ചും ലണ്ടനില്‍ മുംഖംമൂടി ധരിച്ച കവര്‍ച്ചക്കാരുടെ അക്രമത്തിന് ഇരയായത്. മുഖംമൂടി ധരിച്ച് കത്തിയുമായി ഇരുവരും സഞ്ചരിച്ചിരുന്ന വാഹനത്തിനടുത്തേക്ക് എത്തിയ അക്രമികളെ കൊലാസിനാച്ച് ഒറ്റക്കാണ് നേരിട്ടത്ത്.
ഡോര്‍ തുറന്ന് പുറത്തിറങ്ങിയ കൊലാസിനാച്ച് അക്രമിക്ക് നേരെ പാഞ്ഞടുത്തു. ഇതോടെ അക്രമി ഓടി. എന്നാല്‍ വാഹനത്തിന് പിറകിലൂടെ അക്രമി വന്നതോടെ കൊലാസിനാച്ച് അവിടെയും എത്തി അക്രമിയെ നേരിടുകയായിരുന്നു. വാഹനത്തിലുണ്ടായ മെസൂട്ട് ഈ സമയം പുറത്തിറങ്ങാതെ ഇരിക്കുകയായിരുന്നു. തുടര്‍ന്ന് സമീപത്തെ ടര്‍ക്കിഷ് റസ്റ്ററന്റില്‍ അഭയം തേടുകയും ചെയ്തു. നോര്‍ത്ത് ലണ്ടനിലെ ഗോള്‍ഡേഴ്‌സ് ഗ്രീന്‍ സ്ട്രീറ്റിലൂടെ കാറില്‍ സഞ്ചരിക്കുമ്പോള്‍ ആയിരുന്നു പിന്തുടര്‍ന്ന് വന്ന ആക്രമണകാരികളുടെ അതിക്രമം. ഹെല്‍മറ്റ് ധരിച്ച് മുഖം മറച്ചിരുന്ന അക്രമികള്‍ കറുത്ത ഫുള്‍ സ്ലീവ് വസ്ത്രം ആയിരുന്നു ധരിച്ചത്. താരങ്ങള്‍ ര@ണ്ടു പേരും സുരക്ഷിതരാണെന്ന് ആഴ്‌സനല്‍ അധികൃതര്‍ അറിയിച്ചു. എന്താണ് അക്രമികളുടെ ഉദ്ദേശ്യമെന്ന് അറിയില്ലെന്നും പരുക്കില്ലെന്നും കൊലാസിനാച്ചിന്റെ ധൈര്യമാണ് അക്രമികളില്‍നിന്ന് രക്ഷപ്പെടാന്‍ കാരണമായതെന്നും ഓസില്‍ പ്രതികരിച്ചു.