കോവളം: ഓടിക്കൊണ്ടിരുന്ന ബസില്‍ തീപടര്‍ന്നത് പരിഭ്രാന്തി പരത്തി. നാട്ടുകാരും യാത്രക്കാരും തീയണച്ചു. യാത്രക്കാര്‍ പരുക്കേല്‍ക്കാതെ രക്ഷപ്പെട്ടു. ചൊവ്വാഴ്ച വൈകിട്ട് മൂന്നരയ്ക്ക് വാഴമുട്ടം-തിരുവല്ലം റോഡില്‍ പാച്ചല്ലൂരിനു സമീപത്തായിരുന്നു സംഭവം. കോവളത്തുനിന്ന് തിരുവനന്തപുരത്തേക്കുപോയ വിഴിഞ്ഞം ഡിപ്പോയിലെ ബസിനാണ് തീപിടിച്ചത്. ബസിലെ ഫ്യൂസ് കാരിയറില്‍ ഉണ്ടായ ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമായത്.
പുകയും തീയും പൊങ്ങിയതോടെ വണ്ടിനിര്‍ത്തി യാത്രക്കാരെ പുറത്തിറക്കി. ബസ് ജീവനക്കാരും യാത്രക്കാരും നാട്ടുകാരും ചേര്‍ന്ന് തീപടര്‍ന്നു പിടിക്കുന്നത് തടഞ്ഞു. വിവരമറിയിച്ചതിനെ തുടര്‍ന്ന് സ്ഥലത്തെത്തിയ വിഴിഞ്ഞത്തുനിന്നുള്ള ഫയര്‍ഫോഴ്‌സ് സംഘം തീ പൂര്‍ണമായി അണച്ചു.