അരീക്കോട്: ഒരുമാസം മുന്‍പ് അരീക്കോട് സ്റ്റേഷനില്‍ എസ്.ഐയായി ചാര്‍ജെടുത്ത വണ്ടൂര്‍ സ്വദേശി സത്യനാഥനു സസ്‌പെന്‍ഷന്‍. മണല്‍ മാഫിയയുമായി അടുത്ത ബന്ധം പുലര്‍ത്തുന്നുവെന്നും ഇതിലൂടെ ചാലിയാറില്‍ നിന്നും കൂടുതല്‍ മണലെടുപ്പ് നടക്കുന്നുവെന്നുമാണ് സസ്‌പെന്‍ഷന്‍ ഓര്‍ഡറിലുള്ളത്.
എന്നാല്‍ ചാലിയാറില്‍ നിന്ന് വ്യാപകമായി മണലൂറ്റ് നടത്തുന്നവരെയും വയല്‍ നികത്തുന്നവരെയും പിടികൂടാന്‍ പദ്ധതികളാവിഷ്‌കരിച്ചതും വാലില്ലാപ്പുഴ മുസ്‌ലിം ജമാഅത്ത് പള്ളി വിഷയത്തില്‍ ശരിയായ റിപ്പോര്‍ട്ട് നല്‍കിയതുമാണ് നടപടിക്കു കാരണമെന്നറിയുന്നു. കഴിഞ്ഞ ഒരുമാസത്തിനിടെ മണലെടുപ്പ്, മണ്ണ് കടത്ത്, വയല്‍ നികത്തല്‍ തുടങ്ങി നിരവധി കേസുകള്‍ ഇദ്ദേഹത്തിന്റെ നേതൃത്വത്തില്‍ രജിസ്റ്റര്‍ ചെയ്തിട്ടുണ്ട്. ഏഴ് വാഹനങ്ങളും പിടിച്ചെടുത്തിരുന്നു.ഈരണ്ടു സംഭവങ്ങളുടെ അടിസ്ഥാനത്തില്‍ സി.പി.എം നേതൃത്വത്തിന്റെയും കാന്തപുരം വിഭാഗത്തിന്റെയും സമ്മര്‍ദ്ദത്തെ തുടര്‍ന്നാണ് നടപടി.
1976 ല്‍ വാലില്ലാപ്പുഴ മുസ്‌ലിം ജമാഅത്ത് എന്ന പേരില്‍ രജിസ്റ്റര്‍ ചെയ്ത പള്ളി കാന്തപുരം സുന്നീ വിഭാഗം വ്യാജരേഖയുണ്ടാക്കി കൈവശപ്പെടുത്താനുള്ള നീക്കം നടന്നിരുന്നു. ഇതിനെതിരെ നാട്ടുകാര്‍ രംഗത്തെത്തിയതോടെ, കാന്തപുരം വിഭാഗത്തെയും നാട്ടുകാരെയും വിളിച്ചുചേര്‍ത്ത് പെരിന്തല്‍മണ്ണ ആര്‍.ഡി.ഒയുടെ നേതൃത്വത്തില്‍ ചര്‍ച്ച നടത്തുകയും ചെയ്തു. യോഗത്തില്‍ തീരുമാനമാകാത്തതിനെ തുടര്‍ന്ന് ആര്‍.ഡി.ഒ ഏറ്റെടുക്കാന്‍ തീരുമാനിക്കുകയായിരുന്നു.
എന്നാല്‍ സി.പി.എം നേതൃത്വത്തിന്റെയും കാന്തപുരം വിഭാഗത്തിന്റെയും സമ്മര്‍ദ്ദത്തിന്റെ ഭാഗമായി ഒരുവിഭാഗം പ്രവര്‍ത്തനം തുടങ്ങിയത് നാട്ടുകാര്‍ ചോദ്യം ചെയതു. പ്രശ്‌നം പരിഹരിക്കാന്‍ സാധിക്കാതെ വന്നതോടെയാണ് പ്രദേശത്ത് ക്രമസമാധാനം തകരാന്‍ സാധ്യതയുള്ളതായി എക്‌സിക്യൂട്ടീവ് മജിസ്‌ട്രേറ്റിന് എസ്.ഐ റിപ്പോര്‍ട്ട് നല്‍കിയത്. റിപ്പോര്‍ട്ടില്‍ പരാമര്‍ശിച്ചത് പോലെ കഴിഞ്ഞ 28ന് ജുമുഅ നിസ്‌കാരത്തിന് എത്തിയ നാട്ടുകാര്‍ക്ക് മര്‍ദ്ധനേമല്‍ക്കുകയും ചെയ്തിരുന്നു. ഇതാണ് നടപടിക്കു പിന്നിലെ ഒരുകാരണമെന്നറിയുന്നു.
നേരത്തെ പോലീസില്‍ ജോലി ചെയ്തിരുന്ന അരീക്കോട് ഏരിയ സി.പി.എം സെക്രട്ടറിയുടെ നേതൃത്വത്തില്‍ ആഭ്യന്തരവകുപ്പില്‍ സമ്മര്‍ദം ചെലുത്തിയാണ് നടപടിയെന്നു ആക്ഷേപമുണ്ട്. കഴിഞ്ഞ സര്‍ക്കാരിന്റെ കാലത്ത് പൊലിസ് അസോസിയേഷനില്‍ യു.ഡി.എഫ് വിഭാഗത്തിന്റെ ജില്ലാ വൈസ് പ്രസിഡന്‍ായിരുന്നു സത്യനാഥന്‍. ഈ സമയത്തെ മുന്‍വൈരാഗ്യം കൂടി ചേര്‍ത്താണ് നടപടി.