നെടുങ്കണ്ടം:  നിയന്ത്രണംവിട്ട കാര്‍ കൊക്കയിലേയ്ക്കു മറിഞ്ഞു. യാത്രക്കാരായ കുടുംബം പരിക്കുകളില്ലാതെ രക്ഷപെട്ടു. മൂന്നാറിലേയ്ക്ക് പോവുകയായിരുന്ന കാഞ്ചിയാര്‍ വെളളിലാംകണ്ടം സ്വദേശി വെട്ടിക്കൊമ്പില്‍ ഷൈജു പ്രഭാകരന്റെ സ്വിഫ്റ്റ് കാറാണ് നെടുങ്കണ്ടത്തിനടുത്ത് കല്‍കൂന്തലില്‍ അപകടത്തില്‍പെട്ടത്. ഷൈജുവിനോടൊപ്പം ഭാര്യ അമ്പിളി, മക്കളായ ആവണി, അഞ്ചെയിന്‍ എന്നിവരാണ് കാറിലുണ്ടായിരുന്നത്.
കാറിന്റെ പിന്‍സീറ്റിലായിരുന്ന അഞ്ചെയിന്‍ മുന്‍സീറ്റിലേയ്ക്കു കയറിയപ്പോള്‍ കാറോടിച്ചിരുന്ന ഷൈജുവിന്റ കൈയില്‍ പിടിച്ചതിനെതുടര്‍ന്ന് നിയന്ത്രണം നഷ്ടപ്പെട്ട കാര്‍ 30 അടി താഴ്ചയിലേയ്ക്കു മറിയുകയായിരുന്നു.
അഗാധമായ കൊക്കയില്‍ ചെറുമരങ്ങളില്‍ തട്ടിനിന്നതിനാല്‍ വന്‍ ദുരന്തം ഒഴിവായി. ആവണിയുടെ മുഖം ഡോറിലിടിച്ച് രണ്ടു പല്ലുകള്‍ക്ക് പരിക്കേറ്റതൊഴിച്ച് മറ്റാര്‍ക്കും പരിക്കുകളില്ല. സംഭവമറിഞ്ഞ് ഫയര്‍ഫോഴ്‌സും പൊലിസും സ്ഥലത്തെത്തിയിരുന്നു.