ചേന്ദമംഗല്ലൂര്‍: ടൗണിന്റെ സൗന്ദര്യവല്‍ക്കരണത്തിനു പുതിയ പദ്ധതിയുമായി നാട്ടുകാര്‍. 'നമ്മുടെ നാട്; നമ്മുടെ അങ്ങാടി' എന്ന പേരില്‍ നടപ്പാക്കുന്ന ജനകീയ പദ്ധതിയുടെ ഭാഗമായി റോഡിനിരുവശവും കോണ്‍ക്രീറ്റ് ചെയ്ത് മനോഹരമാക്കുന്ന പ്രവൃത്തി കഴിഞ്ഞദിവസം നടന്നു.
 എന്‍ജിനീയര്‍ ടെന്റ് മുഹമ്മദാണ് പ്രവൃത്തി ഏറ്റെടുത്തിരിക്കുന്നത്. നഗരസഭാ കൗണ്‍സിലര്‍മാരും കെ.ടി.സി നജീബ്, എന്‍.കെ ഉമര്‍കോയ, പി.ടി കുഞ്ഞാലി, പി. മുസ്തഫ എന്നിവരുമാണ് നവീകരണത്തിന് നേതൃത്വം നല്‍കുന്നത്. 'അങ്ങാടി' റസിഡന്‍സ് അസോസിയേഷനുമായി സഹകരിച്ചാണ് പദ്ധതി നടപ്പാക്കുന്നത്.
നടപ്പാതകളില്‍ കൈവേലി, ചെടിച്ചട്ടികള്‍, ദിശാസൂചക  ബോര്‍ഡുകള്‍, സന്ദേശ ബോര്‍ഡുകള്‍ എന്നിവ പദ്ധതിയുടെ ഭാഗമായി സ്ഥാപിക്കും. ചേന്ദാംകുന്ന് അങ്കണവാടി മുതല്‍ വയലോരം വരെയുള്ള റോഡിന്റെ ഇരുവശവും കോണ്‍ക്രീറ്റിങ് നടത്തി.
ജനങ്ങളില്‍ നിന്നു സംഭാവന സ്വീകരിച്ചാണ് പ്രവൃത്തി പൂര്‍ത്തീകരിച്ചത്. മുക്കം നഗരസഭാ അധികൃതര്‍ നവീകരണത്തിന് പിന്തുണയുമായി എത്തുമെന്ന പ്രതീക്ഷയിലാണ് നാട്ടുകാര്‍.