കോട്ടയം: പതിമൂന്നാം പഞ്ചവത്സര പദ്ധതിയുടെ ആദ്യ വര്‍ഷത്തേക്ക് ജില്ലയിലെ 11 ബ്ലോക്ക് പഞ്ചായത്തുകള്‍ സമര്‍പ്പിച്ച പദ്ധതികള്‍ക്ക് ജില്ലാ ആസൂത്രണ സമിതിയുടെ അംഗീകാരം .
മുഴുവന്‍ ബ്ലോക്ക് പഞ്ചായത്തുകള്‍ക്കും ഡി.പി.സി അംഗീകാരം ലഭിച്ച ആദ്യ ജില്ലയാണ് കോട്ടയം. വികസന ഫണ്ടിനത്തില്‍ 60.68 കോടി രൂപയുടെയും മെയിന്റനന്‍സ് ഫണ്ടിനത്തില്‍ 6.48 കോടി രൂപയുടെയും പദ്ധതികള്‍ക്കാണ് അംഗീകാരം ലഭിച്ചത്.
കാര്‍ഷിക മേഖലയുടെ വികസനത്തിനായി വാഴൂര്‍ ബ്ലോക്കിന്റെ നേരങ്ങാടി, കിസാന്‍ ആശ്വാസ് പദ്ധതി, മാലിന്യ പ്രശ്‌ന പരിഹാരത്തിനായി പ്ലാസ്റ്റിക് ഷെഡ്ഡിങ് യൂനിറ്റുകള്‍, ളാലം ബ്ലോക്കിലെ ബയോ മെഡിക്കല്‍ വേസ്റ്റ് നിര്‍മ്മാര്‍ജ്ജന യൂണിറ്റ്, ആരോഗ്യ മേഖലയില്‍ ഡയാലിസിസ് യൂനിറ്റുകള്‍, പാലിയേറ്റീവ് കെയര്‍ യൂനിറ്റുകള്‍, കടുത്തുരുത്തി ബ്ലോക്കിലെ പട്ടികജാതിക്കാര്‍ക്കുളള ആധുനിക ശ്മശാനം, കിണര്‍ റീചാര്‍ജ്ജിങ്, ഗ്രാമീണ റോഡുകളുടെ നിര്‍മാണം, മെച്ചപ്പെടുത്തല്‍, വൈദ്യുതി ലൈന്‍ നീട്ടല്‍, സോളാര്‍ ലൈറ്റ് സ്ഥാപിക്കല്‍ തുടങ്ങി ജില്ലയുടെ സമഗ്ര വികസനത്തിനുതകുന്ന നിരവധി പദ്ധതികളാണ് ബ്ലോക്ക് പഞ്ചായത്തുകള്‍ നടപ്പാക്കാനുദ്ദേശിക്കുന്നതെന്ന് അസി. ഡവലപ്പെമെന്റ് കമ്മീഷണര്‍ അറിയിച്ചു.
പട്ടിക ജാതി -പട്ടിക വര്‍ഗ ക്ഷേമത്തിനും വനിതകള്‍, ഭിന്നശേഷിക്കാര്‍, വയോജനങ്ങള്‍ തുടങ്ങിയവര്‍ക്കുള്ള ക്ഷേമ പദ്ധതികളും ബ്ലോക്ക് പഞ്ചായത്തുകള്‍ ആവിഷ്‌കരിച്ചിട്ടുണ്ട്.