ലണ്ടന്‍: ടോട്ടന്‍ഹാമിന്റെ പുതിയ സ്റ്റേഡിയത്തില്‍ ആരാധകര്‍ക്ക് ത്രില്ലിങിന്റെ വിരുന്നൂട്ടി ടോട്ടന്‍ഹാം നായകന്‍ ഹാരി കെയ്ന്‍. സമനിലയിലേക്ക് നീങ്ങുകയായിരുന്ന ഇംഗ്ലീഷ് പ്രീമിയര്‍ ലീഗിലെ ടോട്ടന്‍ഹാം-ആസ്റ്റന്‍ വില്ല മത്സരത്തില്‍ അവസാന രണ്ട് ഗോളുകളുമായി ടീമിന് ഉഗ്രന്‍ ജയം സമ്മാനിച്ചാണ് നായകന്‍ ഹാരി കെയ്ന്‍ വിരുന്നൂട്ടിയത്. 

രണ്ടാം പകുതി തുടങ്ങുമ്പോള്‍ 1-0ന് പിന്നിലായിരുന്ന ടോട്ടന്‍ഹാം പിന്നീട് മൂന്ന് ഗോളുകള്‍ എതിര്‍വലയില്‍ നിക്ഷേ

പിച്ചാണ് ആസ്റ്റന്‍ വില്ലയുടെ ഗംഭീര തുടക്കമെന്ന മോഹത്തിന് തടയിട്ടത്. ടോട്ടന്‍ഹാമിനായി ഹാരി കെയ്ന്‍ ഇരട്ട ഗോള്‍ നേടിയപ്പോള്‍ ഫ്രഞ്ച് മിഡ്ഫീല്‍ഡര്‍ ടാന്‍ഗുയ് ഡോംബലെയുടെ വകയാണ് അവശേഷിക്കുന്ന ഗോള്‍. ആസ്റ്റന്‍ വില്ലയുടെ ഏക ഗോള്‍ സ്‌കോട്ടിഷ് മിഡ്ഫീല്‍ഡര്‍ ജോണ്‍ മഗിന്റെ വകയായിരുന്നു.

ആദ്യ പകുതിയിലെ അവസാന മിനിട്ടു വരെ ആധിപത്യം പുലര്‍ത്തിയ ആസ്റ്റന്‍ വില്ലയ്‌ക്കെതിരേ രണ്ടാം വരവില്‍ മികച്ചൊരു തിരിച്ചു വരവ് നടത്തിയാണ് കെയ്ന്‍പട ആധിപത്യം തട്ടിയെടുത്തത്. ഇത് ടീമിന്റെ വിജയത്തിന് വഴിത്തിരിവാകുകയും ചെയ്തു.

നായകനെ മുന്നില്‍ നിര്‍ത്തി മൗറീഷ്യസ് പൊച്ചെറ്റീനോ ടോട്ടന്‍ഹാമിനെ 4-3-2-1 എന്ന ശൈലിയില്‍ കളത്തിലിറക്കിയപ്പോള്‍ ബ്രസീലിയന്‍ മുന്നേറ്റതാരം വെസ്‌ലിയെ മുന്നേറ്റത്തില്‍ കൊണ്ടുവന്ന് 4-1-4-1 എന്ന ശൈലിയാണ് ആസ്റ്റന്‍വില്ല സ്വീകരിച്ചത്. 

കളി തുടങ്ങി ഒന്‍പതാം മിനുട്ടില്‍ തന്നെ ജോണ്‍ മഗിനിലൂടെ ഗോള്‍ നേടി ആസ്റ്റന്‍വില്ല ടോട്ടന്‍ഹാമിനെ ഞെട്ടിച്ചു. സമനില ഗോളിനായി പൊരുതിയ ടോട്ടന്‍ഹാമിന് രണ്ടാം പകുതി വരെ കാത്തിരിക്കേണ്ടി വന്നു. 73ാം മിനുട്ടില്‍ ലൂക്കാസിന്റെ പാസില്‍നിന്ന് ഡൊംബലേ ടീമിന് ആദ്യ ഗോള്‍ സമ്മാനിച്ചു. എന്നാല്‍ കളി അവസാനിക്കാന്‍ നാലു മിനുട്ട് മാത്രം അവശേഷിക്കേ 86ാം മിനുട്ടില്‍ കെയ്‌ന് ടീമിന് ലീഡ് നേടിക്കൊടുത്തു. നാലു മിനുട്ടുകള്‍ക്കകം ഒരിക്കല്‍ കൂടി കെയ്ന്‍ എതിര്‍വല ചലിപ്പിച്ചതോടെ ടോട്ടന്‍ഹാം വിജയമുറപ്പിച്ചു.