പെരിന്തല്‍മണ്ണ: ജില്ലാ ആശുപത്രിയിലെ പോരായ്മകള്‍ ചൂണ്ടിക്കാട്ടി മഞ്ഞളാംകുഴി അലി എം.എല്‍.എ സമരം നടത്തിയത് കുറ്റബോധം കൊണ്ടെന്ന് സി.പി.എം പെരിന്തല്‍മണ്ണ ഏരിയാ കമ്മറ്റി ആരോപിച്ചു. കഴിഞ്ഞ സര്‍ക്കാരിന്റെ കാലത്ത് ജില്ലയിലെ മൂന്ന് താലൂക്ക് ആശുപത്രികളെ ജില്ലാശുപത്രിയാക്കി ഉയര്‍ത്തി ജില്ലാപഞ്ചായത്തിന്റെ ഭരണ കേന്ദ്രങ്ങളാക്കി ഇവയെ മാറ്റുകയാണ് ചെയ്തത്.
ജില്ലാതലത്തിലേക്ക് ഉയര്‍ത്തിയെങ്കിലും പെരിന്തല്‍മണ്ണയിലെ സര്‍ക്കാര്‍ ആശുപത്രിയില്‍ അതിനുസരിച്ചുള്ള ഭൗതികസൗകര്യങ്ങള്‍ ഒരുക്കാനോ ജീവനക്കാരേ നിയമിക്കാനോ അന്ന് മന്ത്രി കൂടിയായിരുന്ന സ്ഥലം എം.എല്‍.എ കാര്യമായ നടപടികളൊന്നും കൈകൊണ്ടില്ല.
ഇതിന്റെ കുറ്റബോധം കൊണ്ടാണ് ഇപ്പോള്‍ എം.എല്‍.എ സമരവുമായെത്തിയിരിക്കുന്നത്. സംസ്ഥാന സര്‍ക്കാര്‍ ആര്‍ദ്രം പദ്ധതിയില്‍ ഉള്‍പ്പെടുത്തി ആശുപത്രിയുടെ വികസനം പൂര്‍ത്തിയാക്കാന്‍ തീരുമാനിച്ചിട്ടുണ്ടെന്നും ഇതു മറച്ചുവെക്കാനാണ് സമരങ്ങളിലൂടെ യു.ഡി.എഫ് ശ്രമമെന്നും സി.പി.എം നേതാക്കള്‍ കുറ്റപ്പെടുത്തി.