ഇന്ത്യന്‍ മെഡല്‍ പ്രതീക്ഷകള്‍ക്ക് നിറം പകര്‍ന്ന് അത്‌ലറ്റ്ക്‌സിലെ ആദ്യ സംഘം റിയോയിലെത്തി. വിവിധയിനങ്ങളിലായി മത്സരിക്കുന്ന 30 അത്‌ലറ്റുകളില്‍ 12 പേരാണ് റിയോയിലെത്തിയിട്ടുള്ളത്. മറ്റുള്ളവര്‍ ഉടന്‍ എത്തി പരിശീലനത്തിന് ചേരും. ബംഗളൂരുവില്‍ നിന്നു ദുബൈ വഴിയായിരുന്നു സംഘം ബ്രസീലിലെത്തിയത്. 18 മണിക്കൂര്‍ നീണ്ട യാത്രക്കൊടുവിലാണ് റിയോ ഡി ജനീറോ വിമാനത്താവളത്തില്‍ സംഘമിറങ്ങിയത്. 4-400 മീറ്റര്‍ റിലേയില്‍ പങ്കെടുക്കുന്ന ടീമംഗങ്ങള്‍ ഒരുമിച്ചായിരുന്നു ബ്രസീലിലേക്കുള്ള യാത്ര. റിലേ ടീമിന്റെ പരിശീലനവും തുടങ്ങിയിട്ടുണ്ട്. 19ന് ഹീറ്റ്‌സിനായുള്ള തയ്യാറെടുപ്പിലാണ് താരങ്ങള്‍.

ഇന്ത്യന്‍ സംഘങ്ങള്‍ എല്ലാവരും ഒരിടത്താണ് താമസിക്കുന്നത്. ഭക്ഷണം, കാലാവസ്ഥ എന്നിവയെല്ലാം കേരളത്തിലേതിനു സമാനമാണെന്നു കുഞ്ഞുമുഹമ്മദ് പറഞ്ഞു. എക്കാലത്തേയും മികച്ച സംഘവുമായിട്ടാണ് ഇന്ത്യ ഇക്കുറി റിയോയിലെത്തിയിട്ടുള്ളത്. റിലേ ടീമിന് മെഡല്‍ പ്രതീക്ഷയുണ്ടെന്നും നന്നായി പരിശീലനം നടത്തുന്നുണ്ടെന്നും കുഞ്ഞുമുഹമ്മദ് വ്യക്തമാക്കി. കേരളത്തിനു സമാനമായ കാലാവസ്ഥ മികച്ച ഫലമുണ്ടാക്കാന്‍ സാധിക്കുമെന്ന പ്രതീക്ഷയിലാണ് മലയാളി താരങ്ങള്‍.