തൃശൂര്‍: സിവില്‍ സര്‍വീസ് രംഗത്ത് കേരളം അഭിമാകരമായ നേട്ടങ്ങളുണ്ടാക്കിയെടുത്തത് ഈ രംഗത്ത് നാം വേണ്ട വിധത്തില്‍ ശ്രദ്ധിക്കാന്‍ തുടങ്ങിയതോടെയാണെന്ന് മുന്‍ മുഖ്യമന്ത്രി ഉമ്മന്‍ ചാണ്ടി അഭിപ്രായപ്പെട്ടു. തൃശൂര്‍ ടൗണ്‍ ഹാളില്‍ ജവഹര്‍ ദര്‍ശനവേദി സംഘടിപ്പിച്ച വിദ്യഭ്യാസ അനുമോദനചടങ്ങ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. എയിഡഡ് സ്‌കൂളില്‍ പഠിച്ച പലരും സിവില്‍ സര്‍വീസ പരീക്ഷയില്‍ റാങ്കോടെ വിജയിക്കുകയാണ്.
കടുത്ത മത്സരമുള്ള ലോകത്ത് അതിനെ അതിജീവിക്കുവാന്‍ കുറുക്ക് വഴികളൊന്നുമില്ല. ഇച്ഛാശക്തിയോടെ കഠിനാധ്വാനം ചെയു മുന്നേറാന്‍ സാധിച്ചാല്‍ മാത്രമേ ജീവിതത്തില്‍ വിജയംവരിക്കാന്‍ സാധിക്കുകയുള്ളു.
ഇന്ന് ധാരാളം അവസരങ്ങളുണ്ടെങ്കിലും അതുപോലെ തന്നെ കിടമത്സരങ്ങളും ഏറിവരികയാണ്. എല്ലാത്തിനെയും മറികടന്ന് ഉന്നത വിജയം നേടാനുള്ള കരുത്ത് പുതുതലമുറക്ക് ഉണ്ടാവേണ്ടിയിരിക്കുന്നുവെന്നും അദ്ദേഹം കൂട്ടിച്ചേര്‍ത്തു. മുന്‍ മന്ത്രി കെ.പി. വിശ്വനാഥന്‍ അധ്യക്ഷനായി. സി.എന്‍. ബാലകൃഷ്ണന്‍, തേറമ്പില്‍ രാമകൃഷ്ണന്‍, ഡി.സി.സി പ്രസിഡന്റ് ടി.എന്‍. പ്രതാപന്‍, ഒ. അബ്ദുറഹ്മാന്‍കുട്ടി, പി.എ. മാധവന്‍, എന്‍.എസ്. അയൂബ്, ടി.ആര്‍. ജോയ്, പോള്‍.ഡി.മേനാച്ചോരി, ജോണ്‍ ഡാനിയേല്‍ പ്രസംഗിച്ചു. മദ്രാസ് ഐ.ഐ.ടിയില്‍നിന്ന് ഗോള്‍ഡ് മെഡല്‍ നേടി ബി.ടെക്കും എം.ടെക്കും പാസായ മുഹമ്മദ് ഇക്ബാല്‍ കുട്ടികള്‍ക്ക് കരിയര്‍ ഗൈഡന്‍സ് ക്ലാസ് എടുത്തു.