നിലമ്പൂര്‍: പ്രളയ ദുരന്തം ഏറ്റവും അധികം ബാധിച്ചത് മലയോര കര്‍ഷകരെ. കാര്‍ഷിക മേഖലയുടെ നടുവൊടിച്ചാണ് ചാലിയാര്‍ പഞ്ചായത്തിലുള്‍പ്പെടെ കര്‍ഷകര്‍ക്ക് തിരിച്ചടി നേരിട്ടത്. മലയോരങ്ങളിലെ കമുങ് കര്‍ഷകരെയാണ് ഇത് ഏറെ ബാധിച്ചത്. മുന്‍ വര്‍ഷങ്ങളെ അപേക്ഷിച്ച് മൂന്നില്‍ ഒന്ന് അടക്കപോലും കടകളില്‍ എത്തുന്നില്ലെന്ന് വ്യാപാരികള്‍ പറയുന്നു.
പ്രളയബാധിത മേഖലയില്‍ വെള്ളം കെട്ടിനിന്ന് വ്യാപകമായ രീതിയില്‍ അടക്ക കൊഴിഞ്ഞു വീണതാണ് ഉല്‍പാദനം കുറയാന്‍ കാരണം. അടക്കക്ക് വിപണിയില്‍ കിലോക്ക് 40 രുപ വില ലഭിക്കുന്നുണ്ട്. പച്ച അടക്കക്കും പഴുത്ത അടക്കക്കും 40 രൂപ ലഭിക്കുന്നുണ്ടെങ്കിലും ഉല്‍പാദനം കുറഞ്ഞതിനാല്‍ കര്‍ഷകര്‍ക്ക് തിരിച്ചടിയായി.
കമുങ് തോട്ടം പാട്ടത്തിനെടുത്തവരാണ് ഏറെ ദുരിത്തിലായത്. റബര്‍ മേഖലയിലും മുന്‍ വര്‍ഷത്തെ അപേക്ഷിച്ച് വലിയ ഉല്‍പ്പാദന കുറവാണുള്ളത്. ഒരു ബ്ലോക്കില്‍ നിന്ന് 40 ഷീറ്റ് ലഭിച്ചിരുന്ന സ്ഥാനത്ത് ഇപ്പോള്‍ 25 ഷീറ്റു വരെയാണ് പരമാവധി ലഭിക്കുന്നത്. വളത്തിന്റെ ക്ഷാമവും കര്‍ഷകരെ വലക്കുകയാണ്. കൃഷിയെ മാത്രം ആശ്രയിച്ച് ജീവിക്കുന്ന ചെറുകിട കര്‍ഷകരാണ് ഏറെ പ്രതിസന്ധിയിലായത്.