ന്യൂഡല്‍ഹി: വിരാട് കോഹ്‌ലിയുടെയും രവി ശാസ്ത്രിയുടെയും 'ഭായ് ഭായ്' തുടരും. ഇന്നലെ ഇന്ത്യന്‍ ക്രിക്കറ്റ് ടീമിന്റെ പുതിയ പരിശീലകന് വേണ്ടിയുള്ള അഭിമുഖത്തിനൊടുവില്‍ നിലവിലെ ടീം കോച്ച് രവി ശാസ്ത്രിയെ തന്നെ തെരഞ്ഞെടുക്കുകയായിരുന്നു. മുന്‍പ് വിന്‍ഡീസ് പര്യടനത്തിന്റെ തുടക്കത്തില്‍ ഇന്ത്യന്‍ നായകന്റെ പിന്തുണ ശാസ്ത്രിക്ക് നല്‍കിയതോടെ ശാസ്ത്രി തന്നെ പരിശീലകനാവുമെന്ന് ഇന്ത്യന്‍ ആരാധകര്‍ കണക്കുകൂട്ടിയിരുന്നു.
ലോക പ്രശസ്തമായ ആറു ക്രിക്കറ്ററടങ്ങുന്ന ലിസ്റ്റില്‍ നിന്നാണ് 57 കാരനായ ശാസ്ത്രിയെ തെരഞ്ഞെടുത്തത്. ഇതോടെ 2021 ടി20 ലോകകപ്പ് വരെ അദ്ദേഹം ഇന്ത്യന്‍ പുരുഷ ടീമിനെ കളി പഠിപ്പിക്കും. കപില്‍ ദേവിന്റെ നേതൃത്വത്തിലുള്ള ക്രിക്കറ്റ് ഉപദേശക സമിതിയുടെ തെരഞ്ഞെടുപ്പ് പ്രക്രിയയ്ക്ക് ശേഷം വൈകീട്ടാണ് ബി.സി.സി.ഐ ഇക്കാര്യം വെളിപ്പെടുത്തിയത്.
2007 ടി20 ലോകകപ്പില്‍ ഇന്ത്യന്‍ ടീം മാനേജറായ ലാല്‍ചന്ദ് രജ്പുത്, മുന്‍ ഇന്ത്യന്‍ ഫീല്‍ഡിങ് പരിശീലകന്‍ റോബിന്‍ സിങ്, 2007 ലോകകപ്പില്‍ ലങ്കന്‍ ടീമിന്റെ പരിശീലകനായ ടോം മൂഡി, 2015 ലോകകപ്പില്‍ ന്യൂസിലന്റ് ടീമിന്റെ പരിശീലകനായ മൈക് ഹസന്‍, 2016 ലെ ലോക ടി20 യില്‍ വെസ്റ്റ് ഇന്‍ഡീസ് ടീമിന്റെ പരിശീലകനായ ഫില്‍ സിമ്മണ്‍സ് എന്നിവരെ മറികടന്നാണ് ശാസ്ത്രി അഭിമുഖത്തില്‍ ഒന്നാമതെത്തിയത്. മൈക് ഹസന്‍ രണ്ടാമതെത്തിയപ്പോള്‍ ടോം മൂഡി മൂന്നാമതായി. കോച്ചിങ് ഫിലോസഫി, പരിശീലനത്തിലെ പരിചയവും നേട്ടവും, കമ്മ്യൂണിക്കേഷന്‍, ആധുനിക പരിശീലന സാമഗ്രികളുമായുള്ള അറിവ് എന്നിങ്ങനെയുള്ള വിഷയ്ങ്ങളിലായി 100 മാര്‍ക്കിലായിരുന്നു അഭിമുഖം.
കപില്‍ ദേവിനെ കൂടാതെ ശാന്ത രംഗസ്വാമി, അന്‍ഷുമാന്‍ ഗെയ്ക്വാദ് എന്നിവരും പാനലിലുണ്ടായിരുന്നു. ഇന്നലെ രാവിലെ മുംബൈയില്‍ തുടങ്ങിയ അഭിമുഖത്തില്‍ രാജ്പുത്, ഹസ്സന്‍, റോബിന്‍ സിങ് എന്നിവരാണ് എത്തിയത്. ടോം മൂഡിയും രവി ശാസ്ത്രിയും വിഡിയോ കോണ്‍ഫറന്‍സിങിലൂടെ അഭിമുഖത്തെ നേരിട്ടു. എന്നാല്‍ വ്യക്തിപരമായ കാരണത്താല്‍ സിമ്മണ്‍സ് വിട്ടുനിന്നു.
2014-16 കാലയളവില്‍ ഇന്ത്യന്‍ ക്രിക്കറ്റ് ടീമിന്റെ ഡയരക്ടറായി. പിന്നീട് അനില്‍ കുംബ്ലെ പരിശീലകസ്ഥാനത്തെത്തിയതോടെ ശാസ്ത്രിയുടെ സ്ഥാനം പുറത്തായിരുന്നു. പിന്നീട് 2017 ലും ടീമിന്റെ പരിശീലകനായെത്തി.
2017 മുതല്‍ 21 ടെസ്റ്റ് മത്സരങ്ങളില്‍ ഇന്ത്യയെ പരിശീലിപ്പിച്ച ശാസ്ത്രി 11 വിജയം നേടിക്കൊടുത്തു. ഏഴെണ്ണത്തില്‍ പരാജയപ്പെടുകയും ചെയ്തു. ആസ്‌ത്രേലിയക്കെതിരേ നേടിയ ചരിത്ര വിജയവും ഇതില്‍ ഉള്‍പ്പെടും. ഇന്ത്യയെ ടെസ്റ്റ് റാങ്കിങിന്റെ ഒന്നാമതെത്തിക്കാനും സഹായിച്ചു. കൂടാതെ 61 ഏകദിനത്തില്‍ 44 ജയവും 36 ടി20 മത്സരങ്ങളില്‍നിന്ന് 25 ജയവും നേടിക്കൊടുത്തു. ഇക്കഴിഞ്ഞ ഏകദിന ലോകകപ്പില്‍ ഇന്ത്യയെ സെമിയിലെത്തിക്കുന്നതില്‍ നിര്‍ണായക പങ്കുവഹിച്ചിട്ടുണ്ട്.
നിലവിലെ ക്രിക്കറ്റ് പരിശീലകനായതു കൊണ്ട് ശാസ്ത്രിക്ക് ടീമിനെ നന്നായി അറിയാം. ടീമിലെ പ്രശ്‌നങ്ങളും അതിന് എന്ത് പരിഹാരമാണ് നടപ്പിലാക്കേണ്ടതെന്നൊക്കെയുള്ള കാര്യങ്ങള്‍ അദ്ദേഹത്തിന് മനപ്പാഠമാണ്- സമിതിയിലെ പാനലംഗമായ അന്‍ഷുമാന്‍ ഗായക്വാദ് പറഞ്ഞു.