കൊല്‍ക്കത്ത: കൊല്‍ക്കത്തയില്‍ നടക്കുന്ന ഡ്യൂറന്റ് കപ്പില്‍ ഗോകുലം കേരള എഫ്.സിയും റിയല്‍ കശ്മിരും സെമിയില്‍ പ്രവേശിച്ചു. കഴിഞ്ഞ ദിവസം നടന്ന മത്സരം ഉപേക്ഷിച്ചതോടെയാണ് ഗോകുലം സെമി ഉറപ്പിച്ചത്. ചെന്നൈയിന്‍ എഫ്.സിയും ട്രാവുവും തമ്മിലുള്ള മത്സരമാണ് ഉപേക്ഷിച്ചത്.
മത്സരത്തിനിടെ ഇടിമിന്നല്‍ ഉണ്ടായതിനെ തുടര്‍ന്നായിരുന്നു മത്സരം ഉപേക്ഷിച്ചത്. മത്സരം ഉപേക്ഷിച്ചതിനെ തുടര്‍ന്ന് ഇരു ടീമുകളും ഓരോ പോയിന്റ് വീതം പങ്കിട്ടു. ഇതോടെ ഗോകുലം ഗ്രൂപ്പില്‍ ഒന്നാമത് ഫിനിഷ് ചെയ്യും എന്ന് ഉറപ്പായി.
ഗോകുലത്തിന് ഇപ്പോള്‍ 2 മത്സരങ്ങളില്‍ നിന്ന് 6 പോയന്റാണ് ഉള്ളത്. ട്രാവുവിനും ചെന്നൈയിനും 2 മത്സരങ്ങളില്‍ നിന്ന് 1 പോയന്റ് മാത്രമേ ഉള്ളൂ. ഇരുവര്‍ക്കും അവസാന മത്സരം വിജയിച്ചാലും ഗോകുലത്തിന് ഒപ്പം എത്താന്‍ ആവില്ല.
രണ്ടാം സ്ഥാനത്ത് ഉള്ള എയര്‍ ഫോഴ്‌സിന് 3 പോയന്റാണ് ഉള്ളത്. പക്ഷെ ഹെഡ് ടു ഹെഡില്‍ ഗോകുലം മുന്നില്‍ ആയതിനാല്‍ എയര്‍ഫോഴ്‌സുമായി പോയിന്റ് ഒരുപോലെ ആയാലും ഗോകുലം തന്നെ ആകും സെമിയില്‍ പ്രവേശിക്കുക. കഴിഞ്ഞ ദിവസം നടന്ന മറ്റൊരു മത്സരത്തില്‍ എഫ്.സി ഗോവ റിസര്‍വേസിനെ സമനിലയില്‍ പിടിച്ചതോടെയാണ് റിയല്‍ കശ്മിര്‍ സെമിയില്‍ പ്രവേശിച്ചത്. ഗ്രൂപ്പ് ഘട്ടത്തിലെ അവസാന മത്സരത്തില്‍ ഗോകുലം ഇന്ന് വൈകിട്ട് മൂന്നിന് ട്രാവു എഫ്.സിയെ നേരിടും.