മാഡ്രിഡ്: റയല്‍ മാഡ്രിഡ് താരം ടാകെഫുസ കുബോ റയല്‍ മല്ലോര്‍ക്കയില്‍ കളിക്കും. നിലവില്‍ റയല്‍ റിസര്‍വ് ടീമിന്റെ ഭാഗമായ കുബോ ജാപ്പനീസ് മെസ്സി എന്ന് അറിയപ്പെടുന്ന താരമാണ്.
പുതുതായി സ്പാനിഷ് ലീഗിലേക്ക് സ്ഥാനക്കയറ്റം കിട്ടി എത്തിയ ടീമാണ് റയല്‍ മല്ലോര്‍ക്ക. ലോണ്‍ അടിസ്ഥാനത്തിലാണ് താരം മല്ലോര്‍ക്കയിലേക്ക് പോയിട്ടുള്ളത്. ലാലിഗയില്‍ സീനിയര്‍ ടീമുകള്‍ക്കൊപ്പം കളിച്ച് അനുഭവം ഉണ്ടാക്കുക എന്ന ലക്ഷ്യത്തോടെയാണ് താരത്തെ ലോണില്‍ അയച്ചിട്ടുള്ളത്.
ബാഴ്‌സലോണയുടെ യൂത്ത് അക്കാദമിയില്‍ നിന്നായിരുന്നു 18 കാരനായ താരത്തെ റയല്‍ മാഡ്രിഡ് റാഞ്ചിയത്. പ്രീ സീസണില്‍ മികച്ച പ്രകടനം നടത്തിയെങ്കിലും നോണ്‍ യൂറോപ്യന്‍ കളിക്കാരുടെ എണ്ണത്തില്‍ നിയന്ത്രണം ഉള്ളതിനാല്‍ താരത്തെ സീനിയര്‍ ടീമില്‍ ഉള്‍പ്പെടുത്താന്‍ കഴിഞ്ഞിട്ടില്ല. ഇതിനെ തുടര്‍ന്നാണ് താരത്തെ ലോണില്‍ അയക്കുന്നത്.