ചേര്‍ത്തല: ദേശീയപാതയില്‍ കാറും ലോറിയും കൂട്ടിയിടിച്ചുണ്ടായ അപകടത്തില്‍ സീറ്റ് ബെല്‍റ്റില്‍ കുരുങ്ങിയ ഏഴ് വയസുകാരന് ദാരുണാന്ത്യം. കോട്ടയം കാഞ്ഞിരപ്പള്ളി കിഴക്കേതലയ്ക്കല്‍ തോമസ് ജോര്‍ജ്, മറിയം ദമ്പതികളുടെ മകന്‍ ജോഹനാണ് മരിച്ചത്. ഇന്നലെ പുലര്‍ച്ചെ മൂന്നരയോടെ ചേര്‍ത്തല തിരുവിഴയിലാണ് സംഭവം. ചെന്നൈയില്‍ നിന്നും മറിയത്തിന്റെ ആലപ്പുഴയിലെ വീട്ടിലേക്കു പോകുകയായിരുന്നു ഇവര്‍.
തമിഴ്‌നാട് മാര്‍ത്താണ്ഡത്തു നിന്നും പെരുമ്പാവൂരേക്കു തടി കയറ്റി പോകുകയായിരുന്ന ലോറിയുമായി ഇടിച്ചാണ് അപകടമുണ്ടായത്. ജോഹന്‍ സംഭവസ്ഥലത്തു തന്നെ മരിച്ചു. പിന്‍സീറ്റില്‍ സീറ്റ് ബെല്‍റ്റിട്ട് ഇരിക്കുകയായിരുന്നു ജോഹന്‍. അപകടത്തിന്റെ ആഘാതത്തില്‍ സീറ്റ് ബെല്‍റ്റ് നെഞ്ചിലും വയറിലുമായി കുരുങ്ങി ആന്തരികാവയവങ്ങള്‍ക്ക് ഏറ്റ ക്ഷതമാണ് മരണകാരണം. ജോഹന്റെ ദേഹത്ത് സീറ്റ് ബെല്‍റ്റ് മുറുകിയ പാടുകളുണ്ട്. തോമസ് ജോര്‍ജാണ് കാര്‍ ഓടിച്ചിരുന്നത്. ഭാര്യ മറിയവും ഇളയ മകള്‍ ദിയയും ഇടതു വശത്താണ് ഇരുന്നിരുന്നത്. അഗ്‌നിശമനസേനയും പൊലിസും ചേര്‍ന്നാണ് കാര്‍ പൊളിച്ച് ഇവരെ പുറത്തെടുത്ത് ചേര്‍ത്തല താലൂക്ക് ആശുപത്രിയില്‍ എത്തിച്ചത്. എയര്‍ബാഗ് ഉണ്ടായിരുന്നതിനാല്‍ വലിയ അപകടം ഒഴിവായി. തോമസ് ജോര്‍ജിന് കാലിനും മറിയത്തിന് തലയ്ക്കും കൈയ്ക്കും പരുക്കുണ്ട്. ദിയയ്ക്കും നിസാര പരുക്കേറ്റു. ഇവരെ കൊച്ചിയിലെ സ്വകാര്യ ആശുപത്രിയിലേക്ക് മാറ്റി. ജോഹന്റെ മൃതദേഹം ചേര്‍ത്തല താലൂക്ക് ആശുപത്രിയില്‍ പോസ്റ്റുമോര്‍ട്ടം നടത്തി അര്‍ത്തുങ്കലിലെ സ്വകാര്യ ആശുപത്രിയില്‍ സൂക്ഷിച്ചിരിക്കുകയാണ്.