കൊല്ലം: ശബരിമല വിഷയം കൈകാര്യം ചെയ്യുന്നതില്‍ സംസ്ഥാന സര്‍ക്കാര്‍ പരാജയപ്പെട്ടുവെന്ന് എന്‍.കെ പ്രേമചന്ദ്രന്‍ എം.പി പ്രസ്താവനയില്‍ പറഞ്ഞു.
പ്രശ്‌നം സങ്കീര്‍ണ്ണമാക്കി സംസ്ഥാനത്തെ ക്രമസമാധാനനില തകര്‍ത്തതിന്റെ ഉത്തരവാദിത്വം മുഖ്യമന്ത്രിക്കാണ്. അവിശ്വാസികളായ ആക്ടിവിസ്റ്റുകളെ പൊലിസ് സംരക്ഷണം നല്‍കി സന്നിധാനത്തെത്തിച്ച് പ്രകോപനം സൃഷ്ടിക്കുവാന്‍ സര്‍ക്കാര്‍ നടത്തുന്ന ശ്രമം അപലപനീയമാണ്. സര്‍ക്കാര്‍ സ്‌പോണ്‍സേര്‍ഡ് വിശ്വാസ ധ്വംസനമാണ് ഇന്ന് ശബരിമലയില്‍ നടന്നത്. കേന്ദ്രം ഭരിക്കുന്ന ബി.ജെ.പിക്കും കേരളം ഭരിക്കുന്ന സി.പി.എമ്മിനും ഭരണപരവും നിയമപരവുമായ മാര്‍ഗങ്ങളിലൂടെ പ്രശ്‌നം പരിഹരിക്കാമെന്നിരിക്കെ അതിനു മുതിരാതെ മത സാമുദായിക വിഭാഗീയത ഉണ്ടാക്കാന്‍ ശ്രമിക്കുന്നത് ആപത്കരമാണ്. ബി.ജെ.പിക്കും സംഘപരിവാറിനും വളക്കൂറുള്ള മണ്ണാക്കി കേരളത്തെ മാറ്റിയെടുക്കുന്നതിനുള്ള രഹസ്യ അജണ്ട നടപ്പാക്കുകയാണ് മുഖ്യമന്ത്രി. ശബരിമല വിധിക്ക് സമാനമായ നിരവധി വിധികള്‍ സുപ്രീം കോടതിയില്‍ നിന്നുമുണ്ടായപ്പോള്‍ അതിനെയൊക്കെ അതിജീവിക്കാന്‍ സാധ്യമായ എല്ലാ മാര്‍ഗ്ഗങ്ങളും സംസ്ഥാന സര്‍ക്കാര്‍ സ്വീകരച്ചിരുന്നു.
എന്നാല്‍ ഈ വിഷയത്തില്‍ തികച്ചും വിരുദ്ധമായ നിലപാടാണ് സര്‍ക്കാരിന്റേത്. വര്‍ണവിവേചനത്തിന്റെ നാളുകളിലേക്ക് സംസ്ഥാനത്തെ പിന്നോക്കം വലിക്കുന്ന മുഖ്യമന്ത്രിയുടെ പ്രസ്താവന ഭരണഘടനാ വിരുദ്ധവും സത്യപ്രതിജ്ഞാ ലംഘനവും മുഖ്യമന്ത്രി പദവിക്ക് യോജിക്കാത്തതുമാണെന്നും എം.പി. ആവശ്യപ്പെട്ടു.