#എന്‍.എം കോയ പള്ളിക്കല്‍

തേഞ്ഞിപ്പലം: മൂല്യനിര്‍ണയത്തില്‍ പങ്കെടുത്ത അധ്യാപകര്‍ക്ക് ഡ്യൂട്ടി ലീവ് നല്‍കാന്‍ തയാറാകാത്ത കോളജുകള്‍ക്കെതിരേ കാലിക്കറ്റ് സര്‍വകലാശാല നടപടിക്കൊരുങ്ങുന്നു. അധ്യാപകര്‍ക്ക് ഡ്യൂട്ടി ലീവ് നല്‍കാന്‍ സര്‍വകലാശാല പ്രത്യേക ഉത്തരവിറക്കിയിരുന്നു. ഇത് അംഗീകരിക്കാത്ത സ്വാശ്രയ കോളജ് പ്രിന്‍സിപ്പല്‍ അസോസിയേഷന്റെ പിടിവാശിക്കാണ് ഇപ്പോള്‍ തിരിച്ചടിയുണ്ടായിരിക്കുന്നത്.
ഉത്തരവ് അംഗീകരിക്കാതിരിക്കുകയും ഡ്യൂട്ടി ലീവ് നല്‍കാതെ പരീക്ഷാ ഫലം യഥാസമയം പ്രസിദ്ധീകരിക്കുന്നതില്‍ വീഴ്ച വരുത്തുകയും ചെയ്യുന്ന സ്ഥാപനങ്ങള്‍ക്കെതിരേ ശക്തമായ നടപടികള്‍ സ്വീകരിക്കുമെന്ന് കാലിക്കറ്റ് സര്‍വകലാശാല പരീക്ഷാ കണ്‍ട്രോളര്‍ ഡോ. പി. ശിവദാസന്‍ മുന്നറിയിപ്പ് നല്‍കി. ഇതുമായി ബന്ധപ്പെട്ട് സര്‍ക്കാര്‍ ഇറക്കിയ ഉത്തരവ് നടപ്പിലാക്കുന്നതിന്റെ ഭാഗമായാണ് പ്രസ്തുത ഉത്തരവ് അംഗീകരിക്കാത്ത സ്ഥാപനങ്ങള്‍ക്കെതിരേ നടപടിയുമായി മുന്നോട്ടുപോകാന്‍ തീരുമാനിച്ചതെന്നാണ് പരീക്ഷാ കണ്‍ട്രോളര്‍ വ്യക്തമാക്കുന്നത്.
സര്‍വകലാശാലക്ക് കീഴിലെ അധ്യാപകര്‍ക്ക് അനിശ്ചിതമായി മുടങ്ങിക്കിടക്കുന്ന പരീക്ഷാ മൂല്യനിര്‍ണയ വേതനം വിതരണം ചെയ്യാന്‍ കഴിഞ്ഞ ദിവസം ചേര്‍ന്ന പരീക്ഷാ സ്റ്റാന്‍ഡിങ് കമ്മിറ്റിയില്‍ തീരുമാനമായി.
ഓഗസ്റ്റ് 27, 29 തിയതികളില്‍ പരീക്ഷാ ഭവനില്‍നിന്ന് വേതനം നേരിട്ട് വിതരണം ചെയ്യും. അതത് പരീക്ഷാ കേന്ദ്രങ്ങളിലെ ചെയര്‍മാന്‍മാര്‍ മുഖേനയാണ് വിതരണം നടത്തുക.
ഇതുമായി ബന്ധപ്പെട്ട് മുഴുവന്‍ പരീക്ഷാ ചെയര്‍മാന്‍മാര്‍ക്കും നിര്‍ദേശവും നല്‍കിക്കഴിഞ്ഞു.പരീക്ഷാ മൂല്യനിര്‍ണയ വേതനം അനിശ്ചിതമായി മുടങ്ങിയതിനെ തുടര്‍ന്ന് സ്വാശ്രയ കോളജ് അധ്യാപകര്‍ നടത്തിവന്ന പ്രക്ഷോഭത്തിന്റെ ഭാഗമായി കഴിഞ്ഞ ദിവസം പ്രത്യേക പരീക്ഷാ സ്റ്റാന്‍ഡിങ് കമ്മിറ്റി കൂടി അടിയന്തര തീരുമാനമെടുക്കുകയായിരുന്നുവെന്ന് സ്വാശ്രയ കോളജ് അധ്യാപക സംഘടനാ ഭാരവാഹികള്‍ പറഞ്ഞു.
പരീക്ഷാ വിഷയങ്ങളുമായി ബന്ധപ്പെട്ട മറ്റു വിഷയങ്ങള്‍ പരിഹരിക്കുന്നതിനുള്ള തീരുമാനം അടുത്ത സിന്‍ഡിക്കേറ്റില്‍ ഉണ്ടാകുമെന്നും ഇവര്‍ അറിയിച്ചു.