വാഷിങ്ടണ്‍: എഫ്.ബി.ഐയിലെ ഇലക്ട്രോണിക് ടെക്്‌നീഷ്യനായ ചൈനീസ് വംശജന്‍ ചൈനയ്ക്കു വേണ്ടി സുപ്രധാന വിവരങ്ങള്‍ ചോര്‍ത്തി. കുന്‍ ഷാന്‍ ചുങ് എന്ന ജോ ചുന്‍ (46) ആണ് യു.എസ് ദേശീയ അന്വേഷണ ഏജന്‍സിയുടെ വിവരങ്ങള്‍ ചൈനയ്ക്കു വേണ്ടി ചോര്‍ത്തിയത്. കേസില്‍ ഇയാള്‍ കുറ്റക്കാരനാണെന്ന് കണ്ടെത്തി. 1997 മുതലാണ് ചുന്‍ എഫ്.ബി.ഐയില്‍ ജോലി ആരംഭിച്ചത്. മാന്‍ഹട്ടിലെ കോടതിയാണ് ചുന്‍ കേസില്‍ കുറ്റക്കാരനാണെന്ന് കണ്ടെത്തിയത്. കഴിഞ്ഞ മാര്‍ച്ചിലാണ് ചുന്നിനെ അറസ്റ്റ് ചെയ്തത്.

എന്നാല്‍ വിവരം യു.എസ് ഔദ്യോഗികമായി പുറത്തു വിട്ടത് തിങ്കളാഴ്ചയായിരുന്നു. 2011 മുതല്‍ 2016 വരെ ചൈനീസ് ഉദ്യോഗസ്ഥരുടെ നിര്‍ദേശാനുസരണം പ്രവര്‍ത്തിച്ചതായി ഇദ്ദേഹം കോടതിയില്‍ സമ്മതിച്ചു. അതീവരഹസ്യ സ്വഭാവമുള്ള വിവരങ്ങളും ഇയാള്‍ ചൈനയ്ക്കു കൈമാറി. എഫ്.ബി.ഐ ഏജന്റുമാരുടെ യാത്രാവിവരങ്ങള്‍, എഫ്.ബി.ഐയുടെ ആഭ്യന്തര പ്രവര്‍ത്തന രീതി ചാര്‍ട്ട്, രഹസ്യ മേഖലകളുടെ ചിത്രങ്ങള്‍, നീരീക്ഷണ സംവിധാനങ്ങളെ കുറിച്ചുള്ള വിവരങ്ങള്‍ എന്നിവ ചോര്‍ത്തിയതായി അസി. യു.എസ് അറ്റോര്‍ണി എമില്‍ ബോവ് പറഞ്ഞു.

ചൈനയില്‍ ജനിച്ച ചുന്‍ പിന്നീട് യു.എസ് പൗരത്വം സ്വീകരിക്കുകയായിരുന്നു. ചെയ്ത തെറ്റില്‍ ചുന്‍ മാപ്പുചോദിച്ചു. വാദം കേള്‍ക്കലിനു ശേഷം ചുന്നിനെ ജാമ്യത്തില്‍വിട്ടു. കേസില്‍ ഡിസംബര്‍ രണ്ടിന് വീണ്ടും വാദം കേള്‍ക്കും. 27 മാസത്തിനകം കോടതി വിധിക്കെതിരേ ചുന്നിന് അപ്പീല്‍ നല്‍കാം.