ഗുവാഹത്തി: നാഗാലാന്‍ഡില്‍ ഭീകരരുമായുണ്ടായ ഏറ്റുമുട്ടലില്‍ ടെറിട്ടോറിയല്‍ സൈനിക മേജര്‍ വീരമൃത്യു വരിച്ചു. യുനൈറ്റഡ് ലിബറേഷന്‍ ഫ്രണ്ട് ഓഫ് അസം(ഇന്‍ഡിപെന്‍ഡന്റ്) ഭീകരരാണ് അസം റൈഫിള്‍സും ടെറിട്ടോറിയല്‍ ആര്‍മിയുമായി എറ്റുമുട്ടിയത്. നാഗാലാന്‍ഡിലെ മോണ്‍ ജില്ലയിലെ ലാപ്പക്കടുത്ത തിജിയിലായിരുന്നു ഏറ്റുമുട്ടല്‍. ഭീകരരുടെ ആക്രമണത്തില്‍ ഒരു ഓട്ടോ ഡ്രൈവറും മരിച്ചിട്ടുണ്ട്. സൈന്യത്തിന്റെ ശക്തമായ തിരിച്ചടിയില്‍ മൂന്ന് ഭീകരരും കൊല്ലപ്പെട്ടിട്ടുണ്ട്.
ചൊവ്വാഴ്ച രാത്രി തിജിത്തില്‍ ഉള്‍ഫ(ഐ) ഭീകരര്‍ ഓട്ടോ റിക്ഷയില്‍ സഞ്ചരിക്കുന്നുണ്ടെന്ന വിവരത്തെ തുടര്‍ന്ന് പിന്തുടര്‍ന്ന സൈനികര്‍ക്കു നേരെയാണ് ആക്രമണം ഉണ്ടായത്. ഏറ്റുമുട്ടലില്‍ 15 സൈനികര്‍ക്ക് പരുക്കേറ്റിട്ടുണ്ട്.