നായിക്കട്ടി: രോഗികളെ ആശുപത്രിയിലേക്കും തിരികെയെത്തിക്കുന്നതിനുമായി ഇലകട്രിക് ഓട്ടോറിക്ഷയുമായി നൂല്‍പ്പുഴ കുടുംബാരോഗ്യകേന്ദ്രം.
നൂല്‍പ്പുഴ പഞ്ചായത്ത് രണ്ട് ലക്ഷത്തിപതിനായിരം രൂപചിലഴിച്ചാണ് അവശരായ രോഗികള്‍ക്ക് സഹായകമാകുക എന്ന ലക്ഷ്യത്തോടെ ഇലക്ട്രിക് ഓട്ടോറിക്ഷ വാങ്ങിയത്.
ഇതിന്റെ ഗുണം ഏറെയും ലഭ്യമാകുക വയോജനങ്ങള്‍ക്കും ഭിന്നശേഷിക്കാര്‍ക്കുമായിരിക്കും. സൗജന്യമായിട്ടാണ് ഓട്ടോ സര്‍വിസ് നടത്തുക.
ആദ്യഘട്ടത്തില്‍ ആശുപത്രിയിലെത്തുന്ന അവശരായ രോഗികളെയും ഗര്‍ഭിണികളെയും നിരപ്പത്തെ ബസ് കാത്തിരിപ്പു കേന്ദ്രത്തിലും തിരിച്ചും ഓട്ടോയില്‍ എത്തിക്കും.
തുടര്‍ന്ന് ആശുപത്രിയുടെ അഞ്ച് കിലോമീറ്റര്‍ ചുറ്റളവില്‍ താമസിക്കുന്നവര്‍ക്ക് ഓട്ടോയുടെ സേവനം ലഭ്യമാക്കാനുമാണ് ലക്ഷ്യം വെക്കുന്നത്.
എല്‍.ഇ.ഡി.ലിതിയം ബാറ്ററി ഉപയോഗിച്ചാണ് ഓട്ടോറിക്ഷ പ്രവര്‍ത്തിക്കുന്നത്. രണ്ട് മണിക്കൂര്‍ ചാര്‍ജ്ജ് ചെയ്താല്‍ 85 കിലോമീറ്റര്‍ സര്‍വിസ് നടത്താന്‍ കഴിയും.
ഇലട്രിക് സംവിധാനത്തിലാണ് വാഹനം ഓടുക എന്നതിനാല്‍ പരിസ്ഥിതി സൗഹാര്‍ദ്ദവുമാണ്. വാഹനത്തിന്റെ രജിസ്‌ട്രേഷനും ബോഡിവര്‍ക്കുകളും പൂര്‍ത്തികരിച്ച് നംവബര്‍ ആദ്യത്തില്‍ തന്നെ രോഗികള്‍ക്ക് ഓട്ടോ സര്‍വിസ് ലഭ്യമാക്കാനാണ് ഉദ്ദേശിക്കുന്നതെന്ന് മെഡിക്കല്‍ ഓഫിസര്‍ ഡോ.ദാഹര്‍ മുഹമ്മദ് പറഞ്ഞു.
ആശുപത്രിയുടെ പ്രവര്‍ത്തനങ്ങളുമായി സഹകരിക്കുന്ന സന്നദ്ധയുവജനസംഘടനകളുടെ സഹായത്തോടെ ഓട്ടോറിക്ഷ സര്‍വിസ് നടത്താനാണ് ആശുപത്രി അധികൃതരുടെ തീരുമാനം.
രാജ്യത്തെ മികച്ച പ്രാഥമികാരോഗ്യ കേന്ദ്രം എന്ന പദവി സ്വന്തമാക്കിയ ആശുപത്രിയാണ് നൂല്‍പ്പുഴ കുടുംബാരോഗ്യകേന്ദ്രം.
ഇന്ത്യയില്‍ ഗുണനിലവാരമുള്ള ആതുരാലയങ്ങള്‍ കണ്ടെത്താന്‍ നടത്തുന്ന നാഷനല്‍ ക്വാളിറ്റി അഷുറന്‍സ് സര്‍ട്ടിഫിക്കേഷനില്‍ ഉയര്‍ന്ന മാര്‍ക്ക് നേടിയാണ് പ്രാഥമിക ആരോഗ്യകേന്ദ്രങ്ങളില്‍ രാജ്യത്ത് ഒന്നാമതെത്തിയത്.
ആശുപത്രിയില്‍ പാര്‍ക്ക്, ടെലിമെഡിസിന്‍, ഇ ഫാര്‍മസി, ഡിജിറ്റല്‍ ടോക്കണ്‍ കൗണ്ടര്‍ തുടങ്ങിയ അത്യാധുനിക സംവിധാനങ്ങളും ഉണ്ട്.