മൈസൂരു: ജെ.ഡി.എസ് നേതാവ് എച്ച്.ഡി കുമാരസ്വാമിയ്‌ക്കെതിരെ പരാമര്‍ശവുമായി മുന്‍ മുഖ്യമന്ത്രിയും കോണ്‍ഗ്രസ് നേതാവുമായ സിദ്ധരാമയ്യ രംഗത്തെത്തി. കുമാരസ്വാമി തന്നെ ശത്രുവായി കാണുകയാണെന്നും സംസ്ഥാനത്തെ കോണ്‍ഗ്രസ് ജെ.ഡി.എസ് സഖ്യത്തില്‍ തന്നെ കുറ്റക്കാരനാക്കുകയാണെന്നും.

എച്ച്.ഡി കുമാരസ്വാമി ഒരു നല്ല സുഹൃത്തായിട്ടല്ല, പകരം എല്ലാ പ്രശ്‌നങ്ങളിലേക്കും നയിക്കുന്ന കാരണക്കാരനായിട്ടാണ് തന്നെ കാണുന്നതെന്നും ഞായറാഴ്ച അദ്ദേഹം മാധ്യമങ്ങളോട് പറഞ്ഞു.

പതിനാലു മാസം മാത്രം പ്രായമായ സഖ്യസര്‍ക്കാര്‍ വീണതു മുതല്‍ ഇരു നേതാക്കളും തമ്മില്‍ വാക്കുതര്‍ക്കം രൂക്ഷമായിരുന്നു.

ദേവഗൗഡയുടെയും എച്ച്.ഡി കുമാരസ്വാമിയുടേയും ഇടപെടലുകളാണ് തകര്‍ച്ചയ്ക്ക് കാരണമായതെന്ന് സിദ്ധരാമയ്യ പറഞ്ഞിരുന്നു. ബി.ജെ.പി നേതാവ് യെദ്യൂരപ്പയെ മുഖ്യമന്ത്രിയായി കൊണ്ടുവരാനുള്ള ദേവഗൗഡയുടെ നീക്കങ്ങളായിരുന്നു ഇതുവരെ ഉണ്ടായതെന്നും സിദ്ധരാമയ്യ ആരോപിച്ചിരുന്നു.