സിഡ്‌നി: ട്രാക്കിലെ ഇതിഹാസം ഇനി മൈതാനത്ത് ചരിത്രം രചിക്കും. ഒളിംപിക് വേദികളിലെ ട്രാക്കില്‍നിന്ന് സ്വര്‍ണം വാരിക്കൂട്ടിയ ബോള്‍ട്ട് ഇനി മുതല്‍ ഫുട്‌ബോളറായിട്ടായിരിക്കും അറിയപ്പെടുക. ആസ്‌ത്രേലിയന്‍ എ ഡിവിഷന്‍ ക്ലബായ സെന്‍ട്രല്‍ കോസ്റ്റ് മറൈനിന്റെ ഓഫര്‍ ലഭിച്ചെന്ന് ബോള്‍ട്ടിന്റെ ഏജന്റ് റിക്കി സിംസാണ് കഴിഞ്ഞ ദിവസം പുറം ലോകത്തെ അറിയിച്ചത്. സെലക്ഷന്‍ ട്രയല്‍സില്‍ ബോള്‍ട്ട് ഇരട്ട ഗോള്‍ നേടി മികച്ച പ്രകടനം കാഴ്ചവച്ചിരുന്നു. തുടര്‍ന്ന് യൂറോപ്യന്‍ രാജ്യമായ മാള്‍ട്ടയിലെ ക്ലബും ഓഫറുമായി ബോള്‍ട്ടിനെ സമീപിച്ചിരുന്നു. ഇതിനിടെയാണ് സെന്‍ട്രല്‍ കോസ്റ്റ് മറൈന്റെ ഓഫര്‍ ലഭിച്ചിട്ടുള്ളതെന്ന് സിംസ് പറഞ്ഞു. ഇനിമുതല്‍ പ്രൊഫഷനല്‍ ഫുട്‌ബോളറായിട്ടായിരിക്കും 32 കാരനായ ബോള്‍ട്ട് അറിയപ്പെടുക.