കല്‍പ്പറ്റ: ബന്ദിപ്പൂര്‍ വനത്തിലൂടെയുള്ള രാത്രിയാത്രാ നിരോധനപ്രശ്‌നം പരിഹരിക്കുന്നതിന് സുപ്രിം കോടതിയില്‍ സീനിയര്‍ അഭിഭാഷകനെ നിയോഗിക്കുമെന്ന് രാഹുല്‍ ഗാന്ധി എം.പി. ബന്ദിപ്പൂര്‍ വനത്തിലെ ദേശീയപാതയില്‍ മേല്‍പ്പാലങ്ങളാണ് ഏറ്റവും അഭികാമ്യമെന്നും അദ്ദേഹം പറഞ്ഞു.
സുല്‍ത്താന്‍ ബത്തേരിയില്‍ രാത്രിയാത്രാ നിരോധനം പരിഹരിക്കുന്നതിനുള്ള സര്‍വകക്ഷി സംഘവുമായുള്ള ചര്‍ച്ചയിലാണ് രാഹുല്‍ ഗാന്ധി ഇക്കാര്യം അറിയിച്ചത്.
രാത്രിയാത്രാ നിരോധനം മൂലം ജനങ്ങള്‍ അഭിമുഖീകരിക്കുന്ന പ്രശ്‌നങ്ങള്‍ തനിക്ക് വ്യക്തമായി അറിയാമെന്നും ഇത് ലോക്‌സഭയില്‍ ഉന്നയിച്ചതാണെന്നും രാഹുല്‍ പറഞ്ഞു.
മുന്‍ മുഖ്യമന്ത്രി ഉമ്മന്‍ചാണ്ടി, എ.ഐ.സി.സി ജന. സെക്രട്ടറി കെ.സി വേണുഗോപാല്‍ എന്നിവരും ചര്‍ച്ചയില്‍ പങ്കെടുത്തു.
രാത്രിയാത്രാ നിരോധനവുമായി ബന്ധപ്പെട്ട് മുന്‍ സര്‍ക്കാരിന്റെ കാലത്ത് നടത്തിയ പ്രവര്‍ത്തനങ്ങള്‍ ഉമ്മന്‍ചാണ്ടി രാഹുല്‍ ഗാന്ധിയുടെ ശ്രദ്ധയില്‍പ്പെടുത്തി.
പകല്‍ കൂടി യാത്ര നിരോധിക്കാന്‍ അഭിപ്രായമറിയിക്കാന്‍ സുപ്രിം കോടതി നിര്‍ദേശിച്ച പശ്ചാത്തലത്തില്‍ ഇതിന്റെ അപ്രായോഗികതയും ബദല്‍പാതയും വനത്തിലൂടെയാണെന്നതും സുപ്രിം കോടതിയെ അറിയിക്കും. അതിനാവശ്യമായ ക്രമീകരണങ്ങള്‍ ചെയ്യും.
ചര്‍ച്ചയില്‍ ഐ.സി ബാലകൃഷ്ണന്‍ എം.എല്‍.എ, സുല്‍ത്താന്‍ ബത്തേരി നഗരസഭ ചെയര്‍മാന്‍ ടി.എന്‍ സാബു, കെ.കെ അബ്രഹാം, വി.വി ബേബി, വി. മോഹനന്‍, ടി. മുഹമ്മദ്, പി.എം ജോയി, എന്‍.എം വിജയന്‍, അഡ്വ. ടി.എം റഷീദ്, എ. ഭാസ്‌കരന്‍, എം.എ അസൈനാര്‍, കെ.കെ വാസുദേവന്‍, ബാബു പഴുപ്പത്തൂര്‍, ഇ.പി അയ്യൂബ് എന്നിവര്‍ സംബന്ധിച്ചു.