കൃഷ്ണഗിരി: അണ്ടര്‍-16 വിജയ് മര്‍ച്ചന്റ് ട്രോഫി ക്രിക്കറ്റില്‍ കേരളത്തിനെതിരേ ആന്ധ്രയെ ഒറ്റക്ക് തോളിലേറ്റി നാലാം നമ്പര്‍ ബാറ്റ്‌സ്മാന്‍ എസ്.കെ റഷീദ്. 335 പന്തുകള്‍ നേരിട്ട റഷീദ് 23 ബൗണ്ടറികളുടെ പിന്‍ബലത്തില്‍ അടിച്ചുകൂട്ടിയത് 156 റണ്‍സാണ്. രണ്ട് ദിനം ബാറ്റ് ചെയ്ത റഷീദിനെ പുറത്താക്കാന്‍ കേരളത്തിന്റെ ഏഴ് ബൗളര്‍മാര്‍ പരിശ്രമിച്ചിട്ടും സാധിച്ചില്ല. ബൗളര്‍മാര്‍ക്ക് ഒരവസരവും നല്‍കാതെയായിരുന്നു റഷീദിന്റെ അപരാജിയ ഇന്നിങ്‌സ്. ആദ്യദിനം സ്റ്റംപെടുക്കുമ്പോള്‍ 53 റണ്‍സുമായി ക്രീസിലുണ്ടായിരുന്ന റഷീദ് രണ്ടാംദിനവും അതേ മികവ് പുലര്‍ത്തി. ആന്ധ്രക്ക് മികച്ച ടോട്ടല്‍ നല്‍കുന്നതായിരുന്നു റഷീദിന്റെ ഇന്നിങ്‌സ്.