ആറ്റിങ്ങല്‍: ചിറയിന്‍ കീഴിനടുത്ത് ചെറുവള്ളിമുക്കില്‍ ഡി.വൈ.എഫ്.ഐ, ബി.ജെ.പി പ്രവര്‍ത്തകര്‍ തമ്മില്‍ ഏറ്റുമുട്ടലും കല്ലേറും നടന്നു.
 കല്ലേറില്‍ ആറ്റിങ്ങല്‍ സി.ഐ അനില്‍കുമാറിനും മറ്റു നിരവധി പേര്‍ക്കും പരിക്ക്. വ്യാഴാഴ്ച ബി.ജെ.പി യുടെ കൊടിമരം നശിപ്പിച്ചിരുന്നു.
ഇത് ഡി.വൈ.എഫ്.ഐ ക്കാരാണെന്നാരോപിച്ച് വെള്ളിയാഴ്ച പുലര്‍ച്ചെ ഒരു ഡി.വൈ.എഫ്.ഐ പ്രവര്‍ത്തകന്റെ വീടാക്രമിച്ചിരുന്നു.വെള്ളിയാഴ്ച വൈകുന്നേരം 6 മണിയോടെ ഇരുകൂട്ടരും ചെറുവള്ളിമുക്കില്‍ പ്രതിഷേധ പ്രകടനം നടത്തുകയും പ്രകടനം ചെറുവള്ളിമുക്കില്‍ നേര്‍ക്കുനേര്‍ എത്തിയപ്പോള്‍ 7.30 മണിയോടെ പരസ്പരം കല്ലേറും തുടര്‍ന്ന് സംഘട്ടനവും നടക്കുകയുകയുമായിരുന്നു.
ഇത് നിയന്ത്രണ വിധേയമാക്കാന്‍ ശ്രമിച്ച ആറ്റിങ്ങല്‍ സി.ഐ അനില്‍ കുമാറിനും പൊലിസുകാര്‍ക്കും പ്രതിഷേധ പ്രകടനക്കാര്‍ക്കും കല്ലേറില്‍ പരിക്കേറ്റു.
 ഗുരുതരമായി പരിക്കേറ്റ സി.ഐയെ തിരുവനന്തപുരത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ംഭവസ്ഥലത്ത് വന്‍ പൊലിസ് സന്നാഹം ഏതു പരിതസ്ഥിതിയെയും നേരിടാന്‍ തക്കവിധം ഒരുക്കിയിട്ടുണ്ട്.
പൊതുവേ സമാധാനാന്തരീക്ഷം നിലനില്‍ക്കുന്ന ചെറുവള്ളിമുക്കില്‍ അശാന്തിയുളവാക്കുന്ന രീതിയില്‍ നടന്ന ഇത്തരം പ്രവൃത്തി നാട്ടുകാരെ ഭീതിയിലാക്കിയിട്ടുണ്ട്.