മണ്ണാര്‍ക്കാട്: കര്‍ക്കിടാംകുന്ന് പ്രദേശത്ത് തെരവ് നായകളുടെ ശല്യം രൂക്ഷം. ഫാമിനകത്ത് കയറിയ തെരുവ് നായക്കള്‍ നൂറോളം കോഴികളെ കടിച്ചുകൊന്നു.
കര്‍ക്കിടാംകുന്ന് പാലക്കടവിലെ ഏറാടന്‍ വീട്ടില്‍ അബ്ദുല്‍ കരീമിന്റെ ഉടമസ്ഥതയിലുളള ഫാമിലെ കോഴികളെയാണ് വ്യാഴാഴ്ച രാത്രിയില്‍ തെരുവ് നായക്കള്‍ കടിച്ചു കൊന്നത്.
വില്‍പനക്ക് തയ്യാറായ മൂന്ന് കിലോയോളം തൂക്കം വരുന്ന ഗിരിരാജ ഇനത്തില്‍പ്പെട്ട കോഴികളാണ് തെരുവ് നായക്കളുടെ ആക്രമണത്തിന് ഇരയായത്.
വര്‍ഷങ്ങളായി പോള്‍ട്രി ഫാം നടത്തിയിരുന്ന പ്രവാസിയായ കരീം ഈയിടെയാണ് പുതിയ സംരംഭമായ ഗിരിരാജ കോഴി വളര്‍ത്തല്‍ തുടങ്ങിയത്.
ആദ്യമായി ഇറക്കിയ ഗിരിരാജ കോഴികളെയാണ് തെരുവ് നായക്കള്‍ കൊന്നൊടുക്കിയത്.
മേഖലയില്‍ മാസങ്ങളായി തെരവ് നായക്കളുടെ ശല്യം രൂക്ഷമാണ്.
രാവിലെ മദ്‌റസ വിദ്യാര്‍ഥികള്‍ക്കും, മറ്റു കാല്‍നടയാത്രക്കാര്‍ക്കും തെരുവ് നായക്കള്‍ ഭീഷണിയായിട്ടുണ്ട്. രാത്രിക്കാലങ്ങളില്‍ കൂട്ടമായി നടക്കുന്ന പട്ടിക്കൂട്ടം ആട്, പശു പോലത്തെ വളര്‍ത്തു മൃഗങ്ങള്‍ക്കും ഭീഷണിയായി മാറിയിട്ടുണ്ട്.