ടൂറിന്‍: ഇറ്റാലിയന്‍ സീരി എയില്‍ തട്ടകത്ത് സെല്‍ഫ് ഗോളില്‍ വിജയഭാഗ്യം തുണച്ച് യുവന്റസ്. കരുത്തരായ നാപ്പൊളിയെയാണ് 4-3ന് യുവന്റസ് പരാജയപ്പെടുത്തിയത്. മത്സരം 3-3ന് സമനിലയില്‍ കലാശിക്കാനിരിക്കെ നാപ്പൊളിയുടെ സെനഗല്‍ പ്രതിരോധ താരം കാലിഡോ കൗളിബലിയുടെ സെല്‍ഫ് ഗോളാണ് യുവന്റസിന് ജയം സമ്മാനിച്ചത്.
നേരത്തേ മൂന്ന് ഗോളിന് മുന്നില്‍ നിന്ന ശേഷമാണ് യുവന്റസ് പിന്നീട് സമനിലയില്‍ കുരുങ്ങിയത്. ഡാനിലോയും (16) ഗോണ്‍സാലോ ഹിഗ്വെയ്‌നും(19) ആദ്യ പകുതിയില്‍ യുവന്റസിനെ 2-0ന് മുന്നിലെത്തിച്ചു. തുടര്‍ന്ന് 62ാം മിനുട്ടില്‍ റൊണാള്‍ഡോ കൂടി ലക്ഷ്യത്തിലെത്തിച്ചതോടെ യുവന്റസ് മിന്നും ജയം നേടുമെന്ന് തോന്നിച്ചു. എന്നാല്‍ തുടര്‍ന്നടിച്ച നാപ്പൊളിക്കായി കോണ്‍സ്റ്റാന്റിനോസ് മനോലാസ് (66), ഹിര്‍വിങ് ലോസാനൊ (68) എന്നിവര്‍ അടുത്തടുത്ത മിനിട്ടുകളില്‍ ഗോള്‍ നേടിയതോടെ യുവന്റസ് വിജയമോഹത്തിന് തിരിച്ചടി നല്‍കി.
81ാം മിനിറ്റില്‍ ജിയോവാനി ഡി ലോറന്‍സോ കൂടി യുവന്റസ് വല തുളച്ചതോടെ മത്സരം 3-3ന്റെ സമനിലയില്‍. തുടര്‍ന്നാണ് ദൈവദൂതനെപ്പോലെ നാപ്പൊളി ഡിഫന്‍ഡര്‍ യുവന്റസിന് സെല്‍ഫ് ഗോളില്‍ വിജയമൊരുക്കിയത്.