തിരുവനന്തപുരം: ആദ്യ മൂന്ന് കളികളും ഇന്ത്യക്ക് മുന്നില്‍ അടിയറവച്ച ദക്ഷിണാഫ്രിക്കന്‍ സംഘം മാനം കാക്കാന്‍ നാലാം ഏകദിന മത്സരത്തിന് ഇന്നിറങ്ങും. രാവിലെ ഒന്‍പത് മുതല്‍ കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ നടക്കുന്ന മത്സരത്തില്‍ സീനിയര്‍ താരം ശിഖര്‍ ധവാനും മലയാളി താരമായ സഞ്ജു സാംസണും ഇന്ത്യക്കായി ഇറങ്ങും. മലയാളി താരം ശ്രേയസ് അയ്യരാണ് ടീമിനെ നയിക്കുന്നത്. പരുക്കേറ്റ വിജയ് ശങ്കറിന് പകരമായാണ് ധവാന്‍ കളിക്കുക. ആദ്യ മൂന്ന് കളികളിലും പരാജയപ്പെട്ട ദക്ഷിണാഫ്രിക്കന്‍ സംഘം ടീമില്‍ കാര്യമായ അഴിച്ചുപണി നടത്തിയേക്കും.
കാണികള്‍ക്ക് രാവിലെ 8.30 മുതല്‍ നാലാം നമ്പര്‍ഗേറ്റിലൂടെ സ്‌പോര്‍ട്‌സ് ഹബ്ബിലേക്ക് പ്രവേശനം സൗജന്യമാണ്. മത്സരങ്ങള്‍ സ്റ്റാര്‍ സ്‌പോര്‍ട്‌സ് തത്സമയം സംപ്രേഷണം ചെയ്യും. ഹോട്ട്സ്റ്റാറിലൂടെ ലൈവ് സ്ട്രീമിങ്ങുമുണ്ട്. പരമ്പരയിലെ അവസാന മത്സരം ആറിനും നടക്കും. സെപ്റ്റംബര്‍ ഒന്‍പത് മുതല്‍ 12 വരെ നടക്കുന്ന ആദ്യ ടെസ്റ്റിന് മുന്നോടിയായി ടീമുകള്‍ എട്ട്, ഒന്‍പത് തിയതികളില്‍ പരിശീലനം നടത്തും.