തിരൂര്‍: ബസ് കണ്ടക്ടറെയും ക്ലീനറെയും ബസില്‍കയറി വെട്ടിപ്പരുക്കേല്‍പ്പിച്ച കേസില്‍ സി.പി.എം പ്രവര്‍ത്തകനായ അഞ്ചാം പ്രതി അറസ്റ്റില്‍.  ഓട്ടോ ഡ്രൈവര്‍ പറവണ്ണ പുത്തങ്ങാടി പുത്തന്‍പുരയില്‍ അഫ്‌സലി(24)നെയാണു തിരൂര്‍ പൊലിസ് അറസ്റ്റ് ചെയ്തത്. പ്രതികളെത്തിയ ഓട്ടോറിക്ഷയും കഴിഞ്ഞ ദിവസം പൊലിസ് കസ്റ്റഡിയിലെടുത്തു.
അഫ്‌സലിന്റെ ഓട്ടോറിക്ഷയിലെത്തിയായിരുന്നു പ്രതികള്‍ ബസ് തടഞ്ഞു നിര്‍ത്തി യൂത്ത് ലീഗ് പ്രവര്‍ത്തകരെ വെട്ടി പരുക്കേല്‍പിച്ചതെന്നു പൊലിസ് പറഞ്ഞു. സംഭവത്തിനു ശേഷം പ്രതികള്‍ ഇതേ ഓട്ടോയില്‍ രക്ഷപ്പെടുകയും ചെയ്തു. ഇയാള്‍ പറവണ്ണയിലുണ്ടായ രാഷ്ട്രീയ സംഘട്ടനങ്ങളില്‍ നേരത്തെ അറസ്റ്റിലായി ജാമ്യത്തിലിറങ്ങിയ ആളാണെന്നും ഇയാള്‍ക്കെതിരെ മൂന്നോളം കേസുകളുണ്ടെന്നും പൊലിസ് അറിയിച്ചു. അഫ്‌സലിനെ അറസ്റ്റ് ചെയ്തതോടെ അക്രമസംഭവത്തിലെ  അഞ്ചു പ്രതികളും പിടിയിലായി.