ന്യൂഡല്‍ഹി: ബി.ജെ.പി നേതാവും മുന്‍ കേന്ദ്രമന്ത്രിയുമായ സ്വാമി ചിന്മയാനന്ദിനെതിരേ ലൈംഗികപീഡന ആരോപണം ഉന്നയിച്ച നിയമവിദ്യാര്‍ഥിനിയോട് പഠിക്കാനുപദേശിച്ച് സുപ്രിംകോടതി. വിദ്യാഭ്യാസം വളരെ പ്രധാനമുള്ള കാര്യമാണെന്നും അതിനാല്‍ പഠനത്തില്‍ ശ്രദ്ധിക്കണമെന്നും പെണ്‍കുട്ടിയോട് സുപ്രിംകോടതിയിലെ വനിതാ ജഡ്ജി ജസ്റ്റിസ് ഭാനുമതി പറഞ്ഞു. ബി.ജെ.പി നേതാവിനെതിരേ ആരോപണം ഉന്നയിച്ചതിന് പിന്നാലെ പെണ്‍കുട്ടിയെ കാണാതായതോടെ സുപ്രിംകോടതി സ്വമേധയാ സ്വീകരിച്ച ഹരജിയിലാണ് വനിതാ ജഡ്ജിയുടെ ഉപദേശം. ചിന്മയാനന്ദ് ഡയരക്ടറായ എസ്.എസ് കോളജിലെ എല്‍.എല്‍.എം വിദ്യാര്‍ഥിനിയായ പെണ്‍കുട്ടിയെ മറ്റൊരു കോളജിലേക്ക് മാറ്റാന്‍ കഴിഞ്ഞദിവസം സുപ്രിംകോടതി നിര്‍ദേശിച്ചിരുന്നു. കുട്ടിക്കും സഹോദരനും മറ്റൊരു കോളജില്‍ പ്രവേശനം ലഭിക്കുന്നുണ്ടോയെന്ന് ഉറപ്പുവരുത്തണമെന്ന് അഡീഷനല്‍ സോളിസിറ്റര്‍ ജനറല്‍ വിക്രംജിത് ബാനര്‍ജിയോട് കോടതി ആവശ്യപ്പെടുകയും ചെയ്തിരുന്നു.
ഇന്നലെ കേസ് പരിഗണിക്കവെ പെണ്‍കുട്ടിക്ക് പ്രവേശനവും ഹോസ്റ്റലും ശരിയായെന്ന് അധികൃതര്‍ അറിയിച്ചതോടെയാണ് ഭാനുമതിയുടെ ഉപദേശം. അലഹബാദ് ഹൈക്കോടതി ചീഫ് ജസ്റ്റിസിനാണ് അന്വേഷണത്തിന്റെ മേല്‍നോട്ട ചുമതല.
കഴിഞ്ഞയാഴ്ച ഫേസ്ബുക്കില്‍ പോസ്റ്റ്‌ചെയ്ത വിഡിയോയിലൂടെയായിരുന്നു ഉത്തര്‍പ്രദേശിലെ ഷാജഹാന്‍പൂര്‍ സ്വദേശിനിയായ പെണ്‍കുട്ടി ചിന്മയാനന്ദിനെതിരേ ലൈംഗിക ആരോപണം ഉന്നയിച്ചത്.