തിരുവനന്തപുരം: സര്‍ക്കാര്‍ തീരുമാനം കാറ്റില്‍ പറത്തി വനം വകുപ്പുദ്യോഗസ്ഥരുടെ നേതൃത്വത്തില്‍ അക്കേഷ്യ മരങ്ങള്‍ നട്ടത് നാട്ടുകാര്‍ തടഞ്ഞു. വനംവകുപ്പിന്റെ നേതൃത്വത്തില്‍ പേപ്പാറയിലും പാലോട് റെയ്ഞ്ച് മേഖലയിലും പരിസ്ഥിതിക്ക് ദോഷം ചെയ്യുന്ന അക്കേഷ്യ മരങ്ങള്‍ നട്ടുവരികയായിരുന്നു. എന്നാല്‍ നാട്ടുകാരുടെ ശക്തമായ പ്രതിഷേധത്തെ തുടര്‍ന്ന് ഇന്നലെ മരംനടല്‍ നിര്‍ത്തിവച്ചു. സംഭവം വിവാദമായതോടെ ഇവിടെ അക്കേഷ്യ മരങ്ങള്‍ വച്ചുപിടിപ്പിക്കരുതെന്ന് മന്ത്രി കെ. രാജു നിര്‍ദേശം നല്‍കി.
ഹെക്ടര്‍ കണക്കിന് ജനവാസ കേന്ദ്രങ്ങളിലാണ് അക്കേഷ്യ മരങ്ങള്‍ വനം വകുപ്പ് നട്ടു പിടിപ്പിച്ചിരിക്കുന്നത്. ഇന്നലെ രാവിലെയോടെ സംഘടിച്ചെത്തിയ പ്രദേശവാസികള്‍ മരം നടുന്നത് തടഞ്ഞു. നട്ട മരങ്ങള്‍ പിഴുതെറിയുകയും ചെയ്തു. തുടര്‍ന്ന് ഉദ്യോഗസ്ഥരും സ്ഥലവാസികളും തമ്മില്‍ നേരിയ സംഘര്‍ഷമുണ്ടായി.
അതേസമയം തന്റെ അറിവോടെയല്ല ഉദ്യോഗസ്ഥരുടെ നടപടിയെന്ന് മന്ത്രി കെ. രാജു പ്രതികരിച്ചു. മരം നട്ടതുമായി ബന്ധപ്പെട്ട ആക്ഷേപം പരിശോധിക്കും. ജനവാസകേന്ദ്രങ്ങളില്‍ അക്കേഷ്യ പോലുള്ള മരങ്ങള്‍ നടുന്നത് സര്‍ക്കാര്‍ നയമല്ലെന്നും അദ്ദേഹം പ്രതികരിച്ചു.
ഹരിത കേരളം പദ്ധതിയുടെ ഭാഗമായി പരിസ്ഥിതിക്ക് നാശം ഉണ്ടാക്കുന്ന അക്കേഷ്യ, യുക്കാലിപ്‌സ്, ഗ്രാന്‍ഡിസ് തുടങ്ങിയ മരങ്ങള്‍ വച്ചു പിടിപ്പിക്കില്ലെന്ന് സര്‍ക്കാര്‍ തീരുമാനിച്ചിരുന്നു. ഇതു സംബന്ധിച്ച് മുഖ്യമന്ത്രി കര്‍ശന നിര്‍ദേശം നല്‍കുകയും ചെയ്തിരുന്നു. ഇത്തരം മരങ്ങള്‍ പൂര്‍ണമായി ഒഴിവാക്കുമെന്നും അദ്ദേഹം പറഞ്ഞിരുന്നു. ഇതെല്ലാം മറികടന്നാണ് വനംവകുപ്പ് വീണ്ടും മരങ്ങള്‍ നട്ടത്.