തിരുവനന്തപുരം: മെഡിക്കല്‍ കോളജ് ഡോക്ടര്‍മാരുടെ പെന്‍ഷന്‍ പ്രായം ഉയര്‍ത്താന്‍ ആലോചന. വിരമിക്കല്‍ പ്രായം അറുപത്തി രണ്ടില്‍ നിന്ന് അറുപത്തഞ്ച് വയസാക്കാനാണ് സര്‍ക്കാര്‍ നീക്കം. ഇന്നലെ ചേര്‍ന്ന മന്ത്രിസഭാ യോഗത്തില്‍ വിഷയം വന്നെങ്കിലും ചര്‍ച്ച ചെയ്യേണ്ട എന്നും നയപരമായ തീരുമാനമായതിനാല്‍ എല്‍.ഡി.എഫ് യോഗത്തില്‍ വിഷയം ചര്‍ച്ച ചെയ്ത ശേഷം പരിഗണിച്ചാല്‍ ചെയ്താല്‍ മതിയെന്നും തീരുമാനിച്ചതായാണ് വിവരം.

നേരത്തെ പെന്‍ഷന്‍ പ്രായം കൂട്ടുന്നത് സംബന്ധിച്ച് ആരോഗ്യ വകുപ്പ് ധന വകുപ്പിന് ശുപാര്‍ശ നല്‍കിയിരുന്നു. ധന വകുപ്പ് ഫയല്‍ മന്ത്രിസഭാ യോഗത്തിലേയ്ക്ക് വിടുകയായിരുന്നു. ഈ സര്‍ക്കാര്‍ അധികാരത്തില്‍ വന്നശേഷം 2017ലാണ് മെഡിക്കല്‍ കോളജ് ഡോക്ടര്‍മാരുടെ വിരമിക്കല്‍ പ്രായം അറുപതില്‍ നിന്ന് അറുപത്തിരണ്ട് ആക്കി ഉയര്‍ത്തിയത്. വിദഗ്ധരായ ഡോക്ടര്‍മാര്‍ പലരും വിരമിക്കുന്നത് മെഡിക്കല്‍ കോളജ് ആശുപത്രികളിലെ സേവനത്തെ ബാധിക്കുമെന്ന് ചൂണ്ടിക്കാട്ടിയാണ് ആരോഗ്യ വകുപ്പ് പെന്‍ഷന്‍ പ്രായം കൂട്ടാന്‍ ശുപാര്‍ശ ചെയ്തത്.

മുതിര്‍ന്ന പല ഡോക്ടര്‍മാരും വിരമിച്ചാല്‍ പി.ജി കോഴ്‌സുകളെ അത് ബാധിക്കുമെന്നും സീറ്റുകള്‍ നഷ്ടപ്പെടുന്ന അവസ്ഥ ഉണ്ടാകുമെന്നും ആരോഗ്യ വകുപ്പ് പറയുന്നത്. എന്‍ട്രി കേഡറിലെ നിയമനങ്ങള്‍ പലതും വൈകുന്നതും വിരമിക്കല്‍ പ്രായം വര്‍ധിപ്പിക്കാന്‍ കാരണമായി ആരോഗ്യ വകുപ്പ് ചൂണ്ടിക്കാട്ടുന്നു. നിലവിലെ സാമ്പത്തിക പ്രതിസന്ധിയില്‍ പെന്‍ഷന്‍ പ്രായം കൂട്ടുന്നതാണ് ഉചിതമെന്ന അഭിപ്രായം സര്‍ക്കാരിനുണ്ട്.
അതേസമയം, വളരെ ചുരുക്കം ചില ഡോക്ടര്‍മാര്‍ക്കുവേണ്ടിയാണ് വിരമിക്കല്‍ പ്രായം ഉയര്‍ത്താന്‍ നീക്കം നടക്കുന്നതെന്നും പുതിയ നിയമനങ്ങളെ ഇത് സാരമായി ബാധിക്കുമെന്നും മെഡിക്കല്‍ പി.ജി അസോസിയേഷന്‍ ഭാരവാഹികള്‍ പറഞ്ഞു. സര്‍ക്കാര്‍ പെന്‍ഷന്‍ പ്രായം കൂട്ടുന്ന നടപടിയുമായി മുന്നോട്ട് പോയാല്‍ ഒ.പി ബഹിഷ്‌കരിച്ചു കൊണ്ട് ശക്തമായ സമര പരിപാടികള്‍ ആരംഭിക്കുമെന്നാണ് പി.ജി വിദ്യാര്‍ഥികളുടെ നിലപാട്.