ആലുവ: വര്‍ദ്ധിച്ചുവരുന്ന റോഡപകടങ്ങള്‍ കുറക്കുന്നതിനും, മറ്റ് കുറ്റകൃത്യങ്ങള്‍ തടയുന്നതിനുമായി കൊച്ചി റേഞ്ച് ഐ.ജി.പി.വിജയന്റെ ഉത്തരവ് പ്രകാരം എറണാകുളം റൂറല്‍ ജില്ല പൊലീസ് മേധാവി എ.വി.ജോര്‍ജ്ജിന് കീഴില്‍ റൂറല്‍ ജില്ലയില്‍ പൊലിസ് സംയുക്ത പരിശോധന നടത്തി.റൂറല്‍ ജില്ലയിലെ മുഴുവന്‍ പൊലീസ് സ്‌റ്റേഷനുകളിലായി 970 കേസുകള്‍ രജിസ്റ്റര്‍ ചെയ്തു.ഗതാഗത നിയമ ലംഘനങ്ങളുമായി ബന്ധപെട്ട് മദ്യപിച്ച് വാഹനം ഓടിച്ചതിന് 182 കേസുകളും, അലക്ഷ്യമായി വാഹനം ഓടിച്ചതിന് 81 കേസുകളും, മറ്റ് ഗതാഗത നിയമ ലംഘനങ്ങള്‍ക്ക് 636 പെറ്റിക്കേസ്സുകളുമാണ് രജിസ്റ്റര്‍ ചെയ്തത്. ഗതാഗത നിയമ ലംഘനങ്ങള്‍ കൂടാതെ മറ്റു കേസ്സുകളും രജിസ്റ്റര്‍ ചെയ്തു.നാര്‍ക്കോട്ടിക്ക് ഡ്രഗ്‌സ് കേസ്സുകളുമായി ബന്ധപെട്ട് ഒരു കേസും, അബ്ക്കാരി നിയമ് പ്രകാരം 36 കേസ്സുകളും, ചീട്ടുകളി നടത്തിയതിന് മൂന്ന് കേസ്സുകളും രജിസ്റ്റര്‍ ചെയ്തു.
ജാമ്യമില്ലാവകുപ്പു പ്രകാരം രജിസ്റ്റര്‍ ചെയ്ത കേസ്സുകളില്‍ ആറ് പേരെയും, ലോങ് പെന്റിങ് വാറണ്ടുള്ള നാല് പേരെയും, ജാമ്യമില്ല വാറണ്ടുള്ള 83 പേരെയും അറസ്റ്റ് ചെയ്തു. നിരന്തരമായി കുറ്റകൃത്യങ്ങളില്‍ ഏര്‍പ്പെടുന്ന 85 കുറ്റവാളികളെ നിരീക്ഷിച്ചു.ദീര്‍ഘദൂര സര്‍വ്വീസ് നടത്തുന്ന ബസ്സുകള്‍ ഉള്‍പെടെയുള്ള 94 വാഹനങ്ങള്‍ പരിശോധിച്ചു. 69 ലോഡ്ജുകളില്‍ പരിശോധനകള്‍ നടത്തി. ഇനിയും ഇത്തരം സംയുക്ത പരിശോധനകള്‍ തുടരുമെന്ന് ജില്ല പൊലിസ് മേധാവി അറിയിച്ചു.