സ്വന്തം ലേഖകന്‍
തിരുവനന്തപുരം: സാമ്പത്തിക പ്രതിസന്ധിക്കിടയിലും സര്‍ക്കാരിന്റെ ആയിരം ദിനാഘോഷങ്ങള്‍ ജില്ലകളില്‍ നടത്തിയത് ആര്‍ഭാടത്തോടെ. 3.19 കോടി രൂപയാണ് ഇതിനായി ചെലവഴിച്ചത്.
കഴിഞ്ഞ വര്‍ഷത്തെ മഹാപ്രളയത്തിനുശേഷം നവകേരള നിര്‍മാണത്തിനായി പണം കണ്ടെത്താന്‍ നെട്ടോട്ടമോടുമ്പോഴാണ് ആഘോഷപരിപാടികള്‍ നടത്തുന്നതിന് ഇത്രയും തുക ചെലവഴിച്ചത്. എക്‌സിബിഷനും കലാപരിപാടികളും സംഘടിപ്പിച്ചതിനാണ് ഈ തുക ചെലവഴിച്ചത്.
ജില്ലാ കലക്ടര്‍മാര്‍ക്ക് തുക അനുവദിച്ചുകൊണ്ടുള്ള ഉത്തരവ് പുറത്തിറങ്ങി. എക്‌സിബിഷന്‍ സംഘടിപ്പിക്കുന്നതിന് 30 ലക്ഷവും കലാപരിപാടികള്‍ സംഘടിപ്പിക്കുന്നതിന് 5 ലക്ഷം രൂപയും ചെലവാക്കാമെന്നാണ് ജില്ലാ കലക്ടര്‍മാര്‍ക്ക് നേരത്തേ നിര്‍ദേശം നല്‍കിയിരുന്നത്.
ഏറ്റവും കൂടുതല്‍ തുക ചെലവിട്ടത് കോഴിക്കോട്ടാണ്. ഇവിടെ 44,57,033 രൂപ ചെലവഴിച്ചു. തിരുവനന്തപുരം- 10,72,500, കൊല്ലം- 28,02,267, ആലപ്പുഴ- 35,20,140, പത്തനംതിട്ട- 25,00,000, ഇടുക്കി- 34,61,204, എറണാകുളം- 34,36,967, മലപ്പുറം- 24,00,530, പാലക്കാട്- 29,73,764, വയനാട്- 3,31,458, കണ്ണൂര്‍- 24,07,311, കാസര്‍കോട്- 26,13,927 എന്നിങ്ങനെയാണ് മറ്റ് ജില്ലകളിലെ കണക്ക്.
കഴിഞ്ഞ മഹാപ്രളയം കൂടുതല്‍ ദുരിതം വിതച്ച ജില്ലകളില്‍ തകര്‍ന്ന റോഡുകളുടെയും പാലങ്ങളുടെയും പണി ഇതുവരെ തുടങ്ങിയിട്ടില്ല. മഹാപ്രളയത്തെ തുടര്‍ന്ന് പദ്ധതി തുക പോലും വെട്ടിക്കുറച്ച സര്‍ക്കാരാണ് ആയിരം ദിനാഘോഷം കോടികള്‍ ചെലവഴിച്ച് നടത്തിയത്.