കോഴിക്കോട്: കണ്ണൂര്‍ മോഡല്‍ അക്രമം മറ്റിടങ്ങളിലേക്കും വ്യാപിപ്പിക്കാന്‍ സി.പി.എം ശ്രമം നടത്തുന്നതായി ബി.എം.എസ് അഖിലേന്ത്യാ പ്രസിഡന്റ് അഡ്വ. സജി നാരായണന്‍. കഴിഞ്ഞ ദിവസം അക്രമിക്കപ്പെട്ട ബി.എം.എസ് ജില്ലാ കമ്മിറ്റി ഓഫിസ് സന്ദര്‍ശിച്ചശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ആലപ്പുഴ ചേര്‍ത്തല താലൂക്കിലെ ബി.എം.എസ് ഓഫിസും ഇത്തരത്തില്‍ അക്രമത്തിനിരയായിട്ടുണ്ട്. ബി.എം.എസിന് കേരളത്തില്‍ ഒരിടത്തും മാര്‍ക്‌സിസ്റ്റ് പാര്‍ട്ടിയുമായോ മറ്റു പാര്‍ട്ടികളുമായോ പ്രത്യക്ഷമായോ പരോക്ഷമായോ ഒരു പ്രശ്‌നവുമില്ലെന്നും അദ്ദേഹം പറഞ്ഞു.
പ്രശ്‌നങ്ങളൊന്നും ഇല്ലാതിരുന്നിട്ടും ഏകപക്ഷീയമായ അക്രമങ്ങള്‍ നടത്തുകയാണ്. ഇതിനു പിന്നില്‍ അക്രമം വ്യാപിപ്പിക്കാനുള്ള ആസൂത്രണമാണ് സി.പി.എം നടത്തുന്നത്. ഇത്തരത്തില്‍ അക്രമം നടത്തി ബി.എം.എസ് പോലുള്ള സംഘടനകളിലേക്ക് അണികള്‍ പോകുന്നത് തടയാനാണ് അവര്‍ ശ്രമിക്കുന്നത്.
ക്രമസമാധാനം പാലിക്കാന്‍ പൊലിസ് ശ്രമിച്ചാല്‍ പരിഹരിക്കാവുന്ന പ്രശ്‌നമാണിതെല്ലാം. എന്നാല്‍ പൊലിസും ഭരിക്കുന്ന പാര്‍ട്ടിയും നിഷ്പക്ഷമല്ലാത്തതാണ് പ്രശ്‌നങ്ങളുണ്ടാക്കുന്നതെന്നും അദ്ദേഹം കൂട്ടിച്ചേര്‍ത്തു. ബി.എം.എസ് സംസ്ഥാന നേതാക്കളായ വി. രാധാകൃഷ്ണന്‍, പി. ശശിധരന്‍, കെ. ഗംഗാധരന്‍, ജില്ലാ സെക്രട്ടറി ഒ.കെ. ധര്‍മരാജന്‍ എന്നിവരും കൂടെയുണ്ടായിരുന്നു.