താമരശ്ശേരി: 14 ജീവന്‍ നഷ്ടപ്പെട്ട കരിഞ്ചോല ദുരന്തത്തിനു കാരണമായ അനധികൃത നിര്‍മാണപ്രവര്‍ത്തനങ്ങള്‍ കട്ടിപ്പാറ പഞ്ചായത്ത് ഭരണസമിതിയുടെ അറിവോടെയാണെന്ന വിവരം പുറത്തുവന്ന സാഹചര്യത്തില്‍ പഞ്ചായത്ത് ഭരണസമിതി രാജിവയ്ക്കണമെന്ന് കട്ടിപ്പാറ പഞ്ചായത്ത് യു.ഡി.എഫ് ഭാരവാഹികള്‍ വാര്‍ത്താസമ്മേളനത്തില്‍ ആവശ്യപ്പെട്ടു. ഇക്കാര്യം ആവശ്യപ്പെട്ട് ഒക്ടോബര്‍ 30ന് പഞ്ചായത്ത് ഓഫിസ് ഉപരോധമുള്‍പ്പെടെയുള്ള സമര പരിപാടികളുമായി മുന്നോട്ടുപോവും.
ദുരന്തത്തെ കുറിച്ച് അന്വേഷിച്ച ഉദ്യോഗസ്ഥസംഘം ജുലൈ അവസാനം സര്‍ക്കാരിനു റിപ്പോര്‍ട്ട് സമര്‍പ്പിച്ചെങ്കിലും ചിലരെ സംരക്ഷിക്കാനായി റിപ്പോര്‍ട്ട് പൂഴ്ത്തിവയ്ക്കുകയായിരുന്നു.സ്ഥലമുടമ താമരശ്ശേരി തഹസില്‍ദാര്‍, കൃഷി ഓഫിസര്‍ എന്നിവരെ വിവരം അറിയിച്ചിരുന്നുവെന്നും പഞ്ചായത്ത് സെക്രട്ടറിക്ക് അപേക്ഷ നല്‍കിയതായും റിപ്പോര്‍ട്ടില്‍ പറയുന്നുണ്ട്. ദുരന്തത്തിന്റെ ഉത്തരവാദിത്തം ഏറ്റെടുത്ത് ഭരണസമിതി രാജിവച്ച് ജനങ്ങളോട് മാപ്പു പറയാന്‍ തയാറാവണമെന്നും യു.ഡി.എഫ് ആവശ്യപ്പെട്ടു.
ഒ.കെ.എം കുഞ്ഞി, അനില്‍ജോര്‍ജ്, പ്രേംജി ജെയിംസ്, അഡ്വ.ബിജു കണ്ണന്തറ, മുഹമ്മദ് മോയത്ത്, സലീം പുല്ലടി, താര അബ്ദുറഹിമാന്‍ ഹാജി, പി. ബാലന്‍, എന്‍.പി കുഞ്ഞാലിക്കുട്ടി സംബന്ധിച്ചു.