മനാമ: ബഹ്‌റൈനില്‍ അഞ്ചു വയസുകാരിയായ ഇന്ത്യന്‍ ബാലികയെ അജ്ഞാതന്‍ തട്ടിക്കൊണ്ടുപോയതായി പരാതി. ലക്‌നൗ സ്വദേശിയായ അമ്മയുടെ കണ്‍മുന്നില്‍വച്ചാണ് സംഭവം നടന്നത്. സാറ എന്നാണ് കുട്ടിയുടെ പേര്.

ബഹ്‌റൈനിലെ ഹൂറ പ്രവിശ്യയിലാണ് സംഭവം. ഇവിടെ അടുത്തുള്ള ഡേ കെയറില്‍നിന്നു കുട്ടിയെയുംകൂട്ടി വീട്ടിലേക്കു കാറില്‍ വരികയായിരുന്നു മാതാവ്. യാത്രയ്ക്കിടെ കുട്ടിയെ പിന്‍സീറ്റിലിരുത്തി വെള്ളം വാങ്ങാനായി കാര്‍ നിര്‍ത്തി അടുത്തുള്ള കോള്‍ഡ് സ്റ്റോറില്‍ കയറിയിരുന്നു. ഈ സമയത്താണ് അജ്ഞാതന്‍ കാറിനകത്തു കയറി വാഹനം ഡ്രൈവ് ചെയ്തു പോയത്.പൊലിസില്‍ വിവരമറിയിച്ചിട്ടുണ്ട്.

കുട്ടിയെ തട്ടിക്കൊണ്ടു പോയ കാര്‍ ഹൂറയിലെ കെ.എഫ്.സിക്കു സമീപം ഉപേക്ഷിക്കപ്പെട്ട നിലയില്‍ അധികൃതര്‍ കണ്ടെത്തിയിട്ടുണ്ട്. കാര്‍ കണ്ടെത്താനായി ജി.പി.എസ് സംവിധാനവും അധികൃതര്‍ ഉപയോഗിച്ചിരുന്നു. എന്നാല്‍, കാറിലെ ജി.പി.എസ് ഓഫാക്കിയ നിലയിലായിരുന്നു. പൊലിസ് അന്വേഷണം ഊര്‍ജിതമാക്കിയിട്ടുണ്ട്.