സന്‍ആ: യമനില്‍ യുദ്ധാനന്തരം കടുത്ത ക്ഷാമം. മൂന്നു ലക്ഷത്തിലേറെ കുട്ടികള്‍ കടുത്ത വിശപ്പനുഭവിക്കുന്നതായി യു.എന്‍ റിപ്പോര്‍ട്ട്. 15 മാസത്തോളമായുള്ള നിര്‍ത്താതെയുള്ള യുദ്ധം രാജ്യത്തെ പകുതിയിലേറെ ജനങ്ങളെ കടുത്ത ഭക്ഷണ ക്ഷാമത്തിലേക്കു നയിക്കുന്നതായി റിപ്പോര്‍ട്ട് പറയുന്നു.

അഞ്ചു വയസിനു താഴെയുള്ള അഞ്ചു ലക്ഷത്തോളം കുട്ടികള്‍ക്കു പോഷകാഹാരക്കുറവ് രൂക്ഷമായതായും അടിയന്തര ഭക്ഷണ ആരോഗ്യ സഹായം എത്തിക്കണമെന്നും റിപ്പോര്‍ട്ട് സൂചിപ്പിക്കുന്നു. 3,70,000 കുട്ടികള്‍ മരണത്തോടു മല്ലടിക്കുന്നതായി യമനിലെ യു.എന്‍ വക്താവ് മുഹമ്മദ് അല്‍ അസാദി പറഞ്ഞു.

ഹൂതി വിമത സൈന്യത്തിനെതിരായി സഊദി നേതൃത്വത്തിലുള്ള സംയുക്തസേന വ്യോമാക്രമണം ശക്തമാക്കിയ ശേഷം ഒന്‍പതിനായിരത്തോളം പൗരന്മാര്‍ കൊല്ലപ്പെടുകയും 2.8 മില്യണ്‍ ജനങ്ങള്‍ വീടുകളില്‍നിന്ന് ആട്ടിയോടിക്കപ്പെടുകയും ചെയ്തിട്ടുണ്ട്. യുദ്ധാനന്തരം യമനിലെ ജനജീവിതം ദുസഹമായിരിക്കുകയാണ്.