കോട്ടക്കല്‍: അജ്ഞാത ജീവി നാല് കോഴികളെ കൊന്നിട്ട നിലയില്‍. ആമപ്പാറ മദ്‌റസും പടിക്കടുത്ത് കുന്നത്ത് സുനില്‍കുമാറിന്റെ വീട്ടിലാണ് ഞായറാഴ്ച പുലര്‍ച്ചയോടെ അജ്ഞാത ജീവിയുടെ ആക്രമണമുണ്ടായത്. വീട്ടില്‍ വളര്‍ത്തിയിരുന്ന കോഴികളെ കൂടു തകര്‍ത്താണ് കൊന്നിട്ടിരിക്കുന്നത്.
കോഴികളുടെ തലയും കുറച്ചു ഭാഗം മാത്രമേ ജീവി ഭക്ഷിച്ചിട്ടുള്ളൂ. മറ്റു ഭാഗങ്ങള്‍ കഷ്ണങ്ങളാക്കി സമീപത്തുതന്നെ ഇട്ടിരിക്കുകയാണ്. മഴയുള്ള സമയമായതിനാല്‍ കൂടിന് സമീപത്ത് ആഴത്തിലുള്ള വലിയ കാല്‍പ്പാടുകളും പതിഞ്ഞിട്ടുണ്ട്. ഇതേ ദിവസം സമീപത്തുള്ള വീടുകളിലും സമാനമായ ആക്രമണം നടന്നിട്ടുള്ളതായി പറയുന്നു. ഇരുമ്പുകൂടുകള്‍ തകര്‍ക്കാന്‍ നായക്കോ മറ്റോ പറ്റില്ലെന്നിരിക്കെ നാട്ടുകാരും ഭീതിയിലാണ്.