ദമാം: മുസ്ലീം യൂത്ത് ലീഗ് സംസ്ഥാന നേതാക്കളായ പാണക്കാട് സയ്യിദ് മുനവ്വിറലി ശിഹാബ് തങ്ങളും പികെ ഫിറോസും വെള്ളിയാഴ്ച കിഴക്കന്‍ പ്രവിശ്യാ കെ.എം.സി.സി സംഘടിപ്പിക്കുന്ന ഹജ്ജ് സന്നദ്ധ സേവകര്‍ക്കുള്ള അനുമോദന സമ്മേളനത്തില്‍ പങ്കെടുക്കുമെന്നു സ്വാഗത സംഘം ഭാരവാഹികള്‍ വാര്‍ത്താക്കുറിപ്പില്‍ അറിയിച്ചു. ദമാം ഫൈസലിയ്യ ബറക്ക ഹാളില്‍ സെപ്റ്റംബര്‍ 13 വെള്ളി രാത്രി 8 മണിക്ക് നടക്കുന്ന അനുമോദന ചടങ്ങില്‍ പ്രവിശ്യാ കെ.എം.സി.സിയെ പ്രതിനിധീകരിച്ചു സഊദി കെഎംസിസി ഹജ്ജ് സെല്ലിന് കീഴില്‍ മിനായില്‍ സേവനം ചെയ്ത് വിവിധ സെന്‍ട്രല്‍ കമ്മിറ്റികളില്‍ നിന്നുള്ള നൂറോളം വാളണ്ടിയര്‍മാര്‍ക്ക് സര്‍ട്ടിഫിക്കറ്റുകള്‍ സമ്മാനിക്കും.

പ്രവിശ്യാ കെ.എം.സി.സി ഹജ്ജ് സെല്‍ പ്രവര്‍ത്തനങ്ങള്‍ക്ക് വര്‍ഷങ്ങളായി പിന്തുണ നല്‍കി വരുന്ന ദാറുസ്സിഹ ക്ലിനിക്കിനുള്ള പുരസ്‌കാരം എം.ഡി. ഡോ സിദ്ധീക്ക് അഹമ്മദ് മുനവ്വിര്‍ തങ്ങളില്‍ നിന്നും ഏറ്റുവാങ്ങും. മുസ്ലീം യൂത്ത് ലീഗ് ദേശീയ നിര്‍വ്വാഹക സമിതിയംഗം ഷിബു മീരാന്‍ പെരുമ്പാവൂര്‍, പ്രവിശ്യയിലെ മത സാമൂഹിക രംഗത്തെ പ്രമുഖരും ചടങ്ങില്‍ സംബന്ധിക്കും. വിവിധ സെന്‍ട്രല്‍ ജില്ലാ കമ്മിറ്റികളില്‍ നിന്നായി നൂറുകണക്കിന് പ്രവര്‍ത്തകര്‍ പങ്കെടുക്കുന്ന വിപുലമായ സമ്മേളനത്തിന്റെ ഒരുക്കങ്ങള്‍ പൂര്‍ത്തിയായതായി പ്രവിശ്യാ കെ.എം.സി.സി പ്രസിഡണ്ട് മുഹമ്മദ് കുട്ടി കോഡൂര്‍, ജനറല്‍ സെക്രട്ടറി ആലിക്കുട്ടി ഒളവട്ടൂര്‍ എന്നിവര്‍ വാര്‍ത്താക്കുറിപ്പില്‍ അറിയിച്ചു