കൊല്‍ക്കത്ത: ഖത്തര്‍ എയര്‍വേയ്‌സ് വിമാനവും വാട്ടര്‍ ടാങ്കറും കൂട്ടിയിടിച്ച് അപകടം. കൊല്‍ക്കത്ത വിമാനത്താവളത്തില്‍നിന്നും നൂറിലധികം യാത്രക്കാരുമായി ദോഹയിലേക്ക് പോകാനിരുന്ന വിമാനമാണ് അപകടത്തില്‍പ്പെട്ടത്.

വ്യാഴാഴ്ച പുലര്‍ച്ചെ 2.30 നായിരുന്നു വിമാനം പുറപ്പെടേണ്ടിയിരുന്നത്. ടേക്ക് ഓഫ് ചെയ്യാന്‍ തുടങ്ങുമ്പോഴാണ് വിമാനത്താവളത്തിലെ വാട്ടര്‍ ടാങ്കറിലിടിച്ചതെന്ന് എയര്‍പോര്‍ട്ട് അതോറിറ്റി ഓഫ് ഇന്ത്യ (എ.എ.ഐ) ഒഫീഷ്യല്‍ പിടിഐയോട് പറഞ്ഞു.

സംഭവത്തിനുപിന്നാലെ വിമാനത്തില്‍നിന്നും മുഴുവന്‍ യാത്രക്കാരെയും സുരക്ഷിതമായി പുറത്തിറക്കി. ആര്‍ക്കും പരുക്കേറ്റിട്ടില്ലെന്ന് എ.എ.ഐ അധികൃതര്‍ വ്യക്തമാക്കി. 103 യാത്രക്കാര്‍ക്കും വിമാനത്താവളത്തിന് അടുത്തുളള ഹോട്ടലില്‍ താമസ സൗകര്യം ഒരുക്കി. ഇവര്‍ക്ക് നാളെ പുലര്‍ച്ചെ മൂന്നു മണിക്കുളള വിമാനത്തില്‍ യാത്രാ സൗകര്യം ഒരുക്കും, എ.എ.ഐ അധികൃതര്‍ പറഞ്ഞു.

അപകടത്തില്‍ വിമാനത്തിന് കേടുപാടുകള്‍ പറ്റിയിട്ടുണ്ട്.