അങ്ങാടിപ്പുറം:  ഗതാഗതക്കുരുക്കില്‍  പൊതുജനവും ട്രാഫിക് പൊലീസും വീര്‍പ്പുമുട്ടുന്ന അങ്ങാടിപ്പുറത്ത് ഇതാ ദയയുള്ളൊരു പൊലിസ്. ഗതാഗതക്കുരുക്കിനു പേരു കേട്ട അങ്ങാടിപ്പുറത്തു വാഹനങ്ങള്‍ നിയന്ത്രിക്കാന്‍ പോലും ട്രാഫിക് പൊലിസിനു സമയം കിട്ടാറില്ല. പക്ഷേ, കാക്കിക്കുള്ളിലെ കനിവിന് അതൊന്നും പ്രശ്‌നമല്ല. അന്ധനായ വൃദ്ധനെ കൈപിടിച്ചു ബസില്‍കയറ്റുന്ന അനില്‍ ചാക്കോ എന്ന പൊലീസുകാരന്റെ ചിത്രം സോഷ്യല്‍ മീഡിയയില്‍ വൈറലാവുകയാണ്.
പൊരിവെയിലത്തു കറുത്ത കണ്ണടയും വച്ചു ഗതാഗതം നിയന്ത്രിക്കുന്ന അനില്‍ ചാക്കോ എന്ന പൊലീസ് ഉദ്യോഗസ്ഥന്‍ പെരിന്തല്‍മണ്ണക്കാര്‍ക്കു സുപരിചിതനാണ്. ഒരുപക്ഷേ, പേര് അറിയില്ലെന്നു മാത്രം. ഗതാഗതക്കുരുക്ക് ഒരു മിനിറ്റ് നീണ്ടാല്‍ പോലും ട്രാഫിക് പൊലിസിനെ പഴി പറയുന്നതാണല്ലോ യാത്രക്കാരുടെ ശീലം. അതേസമയം ഇവര്‍ അനുഭവിക്കുന്ന ത്യാഗവും ബുദ്ധിമുട്ടും സഹിഷ്ണുതയും ആരും ഓര്‍ക്കാറുമില്ല.
കുറച്ചു സമയം വെയിലത്തു ഗതാഗതക്കുരുക്കില്‍ നിന്നാല്‍ ഒരു കുപ്പി വെള്ളം അകത്താക്കുന്ന നമ്മള്‍ ഇവരുടെ ദാഹത്തെപ്പറ്റി ചിന്തിക്കാറുമില്ല. പൊടിപടലവും പുകയും ഇവരില്‍ വരുത്തുന്ന രോഗങ്ങളും കുറവല്ല. ഇനിയെങ്കിലും നമുക്ക് ഇവരെ മാനിക്കാന്‍ പഠിക്കാം.