ജിദ്ദ: അടുത്ത മാസം 16 മുതല്‍ റിയാദില്‍നിന്ന് കോഴിക്കോട്ടേക്ക് ആരംഭിക്കുന്ന സഊദിയിലെ ഫ്‌ളൈനാസ് നിരക്കുകള്‍ പ്രഖ്യാപിച്ചു. 634 റിയാല്‍ മുതലാണ് (12,127 രൂപ) പുതിയ ടിക്കറ്റ് നിരക്ക്. നിലവില്‍ സഊദിയില്‍ ഏറ്റവും കുറഞ്ഞ നിരക്കില്‍ സര്‍വിസ് നടത്തുന്ന വിമാനക്കമ്പനിയാണ് ഫളൈനാസ്. ആഴ്ചയില്‍ മൂന്ന് ദിവസം സര്‍വിസുകളുണ്ടാകും.
തിങ്കള്‍, ബുധന്‍, വെള്ളി ദിവസങ്ങളിലായിരിക്കും സര്‍വിസ്. പുലര്‍ച്ചെ 12.50ന് റിയാദില്‍നിന്ന് പുറപ്പെടുന്ന വിമാനം രാവിലെ 8.35ന് കരിപ്പൂരിലെത്തും. തിരിച്ച് 9.25ന് പുറപ്പെട്ട് 12ന് റിയാദിലെത്തും.
ജിദ്ദ, ദമാം എന്നിവിടങ്ങളിലേക്ക് കണക്ഷന്‍ ഫ്‌ളൈറ്റുകളുമുണ്ട്. കോഴിക്കോട്ടേക്കുള്ള ടിക്കറ്റുകള്‍ക്ക് നേരത്തെ തന്നെ ബുക്കിങ് ആരംഭിച്ചിരുന്നു. ആദ്യം 545 റിയാലിന് വരെ ലഭ്യമായിരുന്ന ടിക്കറ്റുകള്‍ ഇപ്പോള്‍ 634 റിയാലിന് ലഭ്യമാണ്. 20 കിലോയാണ് സൗജന്യമായി കൊണ്ടുപോകാവുന്ന ബാഗേജ്. നിശ്ചിത സംഖ്യയടച്ചാല്‍ 30ഉം 40ഉം കിലോ കൊണ്ടുപോകാം.