കണ്ണൂര്‍: കണ്ണൂരില്‍നിന്നു കുവൈത്തിലേക്കു നേരിട്ടുള്ള ഗോ എയര്‍ വിമാനം ഇന്നു സര്‍വിസ് തുടങ്ങും. ഇന്നുമുതല്‍ എല്ലാദിവസവും കുവൈത്തിലേക്കു സര്‍വിസ് നടത്തുന്ന എ 320 വിമാനത്തില്‍ 180 പേര്‍ക്കു യാത്രചെയ്യാനാകും.
രാവിലെ ഏഴിനു കണ്ണൂരില്‍നിന്നു പുറപ്പെട്ട് പ്രാദേശിക സമയം 9.30ന് കുവൈത്തില്‍ എത്തിച്ചേരും. കുവൈത്ത് സമയം രാവിലെ 10.30ന് പുറപ്പെട്ട് വൈകിട്ട് ആറിന് കണ്ണൂരില്‍ എത്തും. ഇന്നുരാവിലെ വിമാനത്താവളത്തില്‍ നടക്കുന്ന ഫ്‌ളാഗ് ഓഫ് ചടങ്ങില്‍ കിയാല്‍ എം.ഡി വി. തുളസീദാസ് മുഖ്യാതിഥിയാകും.
കണ്ണൂര്‍ വിമാനത്താവളം മിഡില്‍ ഈസ്റ്റ് ഹബ്ബാക്കിയ ഗോ എയര്‍ ദുബൈ, അബുദാബി, മസ്‌ക്കത്ത് എന്നിവിടങ്ങളിലേക്കു നിലവില്‍ നേരിട്ടു സര്‍വിസ് നടത്തുന്നുണ്ട്. വൈകാതെ സിംഗപ്പൂരിലേക്കും സര്‍വിസ് ആരംഭിക്കുമെന്നു ഗോ എയര്‍ വൈസ് പ്രസിഡന്റുമാരായ സമീര്‍ പട്ടേല്‍ (നെറ്റ് വര്‍ക്ക് പ്ലാനിങ്), അര്‍ജുന്‍ദാസ് ഗുപ്ത (ഇന്റര്‍നാഷണല്‍ ഓപ്പറേഷന്‍സ്) എന്നിവര്‍ പറഞ്ഞു. മറ്റൊരു സ്വകാര്യ വിമാനക്കമ്പനിയായ ഇന്‍ഡിഗോയ്ക്കും കണ്ണൂരില്‍നിന്നു കുവൈത്തിലേക്കു നേരിട്ടു സര്‍വിസുണ്ട്.