ന്യൂഡല്‍ഹി: ശബരിമലയില്‍ നിര്‍മാണ പ്രവര്‍ത്തനങ്ങള്‍ക്ക് പൂര്‍ണവിലക്ക് ഏര്‍പ്പെടുത്തിയിട്ടില്ലെന്ന് സുപ്രിംകോടതി. മാസ്റ്റര്‍പ്ലാന്‍ അനുസരിച്ച് നിര്‍മാണം നടത്താം. നിയമപരമായ കെട്ടിടങ്ങള്‍ക്ക് അറ്റകുറ്റപ്പണി നടത്താം. നിര്‍മാണങ്ങള്‍ സ്റ്റേ ചെയ്യണമെന്ന ഉന്നതാധികാര സമിതിയുടെ ആവശ്യം കോടതി പരിഗണിച്ചില്ല. അതേസമയം, ശബരിമലയിലെ അനധികൃത നിര്‍മാണങ്ങള്‍ പൊളിക്കേണ്ടിവരുമെന്നും സുപ്രിംകോടതി അറിയിച്ചു.

ശബരിമലയില്‍ പ്രളയത്തില്‍ തകര്‍ന്ന കെട്ടിടങ്ങളുടെ അറ്റകുറ്റപ്പണി നടത്തുന്നതുമായി ബന്ധപ്പെട്ടാണ് ഇന്ന് കോടതിയില്‍ പ്രധാനമായും വാദം നടന്നത്.

അറ്റകുറ്റപ്പണികള്‍ ഈ മാസം 15 നകം പൂര്‍ത്തിയാക്കുമെന്ന് സര്‍ക്കാര്‍ കോടതിയെ അറിയിച്ചു. തുടര്‍ന്ന്, അറ്റകുറ്റപ്പണി നടത്തേണ്ട കെട്ടിടങ്ങളുടെ വിവരങ്ങള്‍ കൈമാറണമെന്ന് കോടതി സര്‍ക്കാരിനോട് നിര്‍ദ്ദേശിച്ചു.