വിജയവാഡ: അരുണാചല്‍പ്രദേശ് രജിസ്‌ട്രേഷനുള്ള മുഴുവന്‍ സ്വകാര്യ ബസുകളും പിടിച്ചെടുക്കാന്‍ മുഖ്യമന്ത്രി എന്‍. ചന്ദ്രബാബു നായിഡു ഗതാഗത വകുപ്പിന് നിര്‍ദേശം നല്‍കി. അരുണാചല്‍ രജിസ്‌ട്രേഷനിലുള്ള വാഹനങ്ങള്‍ സംസ്ഥാനത്തെ നിയമങ്ങള്‍ പാലിക്കുന്നില്ലെന്ന് കണ്ടെത്തിയതാണ് നടപടിക്ക് കാരണം.
 ബസുകള്‍ പിടിച്ചെടുക്കുന്ന സാഹചര്യത്തില്‍ യാത്രാ ക്ലേശം ഇല്ലാതാക്കാന്‍ കൂടുതല്‍ സര്‍ക്കാര്‍ ബസുകള്‍ ഉപയോഗപ്പെടുത്താന്‍ മുഖ്യമന്ത്രി നിര്‍ദേശം നല്‍കി. അരുണാചല്‍ രജിസ്‌ട്രേഷന്‍ ബസുകള്‍ കണ്ടെത്തുന്നതിനായി ഗതാഗത വകുപ്പിന്റെ പ്രത്യേക ടീമിനെ നിയമിച്ചിട്ടുണ്ട്. സംസ്ഥാനത്ത് 900 സ്വകാര്യ ബസുകളാണ് അരുണാചല്‍ രജിസ്‌ട്രേഷനിനിലുള്ളത്.
ഇത്തരം ബസുകളുടെ ഉടമസ്ഥര്‍, രജിസ്‌ട്രേഷന്‍ സംബന്ധിച്ച വിവരങ്ങള്‍ എന്നിവ തേടി ആന്ധ്രാ സര്‍ക്കാര്‍ അരുണാചല്‍ സര്‍ക്കാരിന് കത്തയച്ചിട്ടുണ്ട്. വടക്കു കിഴക്കന്‍ സംസ്ഥാനങ്ങളില്‍ വാഹന രജിസ്‌ട്രേഷന്‍ ഫീസ് കുറവാണ്. ഇത് പ്രയോജനപ്പെടുത്തിയാണ് പല വാഹനങ്ങളും അരുണാചല്‍ രജിസ്‌ട്രേഷനിലേക്ക് മാറിയത്.