വടകര : പരമ്പരാഗത രീതിയിലുള്ള അമര കൃഷിയെ പ്രോല്‍സാഹിപ്പിക്കുന്നതിനായി മഹാത്മ ദേശസേവ ട്രസ്റ്റിന്റെ ആഭിമുഖ്യത്തില്‍ 'വീട്ടുമുറ്റത്തൊരു അമരപ്പന്തല്‍' മത്സരം സംഘടിപ്പിക്കുമെന്ന് ട്രസ്റ്റ് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
മത്സരത്തില്‍ പങ്കെടുക്കുവാന്‍ ആഗ്രഹിക്കുന്നവര്‍ നല്ലവണ്ണം സൂര്യപ്രകാശവും നീര്‍വാര്‍ച്ചയുമുള്ള സ്ഥലത്ത് ജൂണ്‍ നാലാം വാരത്തില്‍ മുക്കാല്‍ മീറ്റര്‍ ആഴവും വീതിയുമുള്ള കുഴി തയാറാക്കി തൂപ്പും വളവും നിറച്ച് മേല്‍ മണ്ണ് കൊണ്ട് മൂടിവെക്കേണ്ടതാണ്. കര്‍ക്കിടകവാവു ദിവസം (ജൂലയ് 23 ന് ) മേല്‍മണ്ണില്‍ വിത്തു നടണം. ഇതിന് ശേഷം രജിസ്റ്റര്‍ ചെയ്യണം.
എല്ലാവീടുകളിലും ഒരേ സമയത്ത് വിത്തിറക്കുന്നതിനാല്‍ കീടങ്ങള്‍ വിഭജിക്കപ്പെടുന്നതിനാല്‍ കീടനാശിനി പ്രയോഗിക്കേണ്ടി വരുന്നില്ല എന്നതും എല്ലാ പന്തലിലും ഒരേ സമയം പൂക്കള്‍ ഉണ്ടാകുന്നതിനാല്‍ പരാഗണം നടക്കുകയും എല്ലാ പൂവുകളും കായകളാകുകയും ചെയ്യും.
ഏറ്റവും മികച്ച പന്തലിന് 5000 രൂപയുടെയും രണ്ടാമത്തേതിന് 3000 രൂപയും മൂന്നാമത്തേതനിന് 2000 രൂപയുടെയും കാഷ് അവാര്‍ഡുകള്‍ നല്‍കുന്നതാണ്.
പേര് രജിസ്റ്റര്‍ ചെയ്യാവുന്ന സ്ഥാപനങ്ങള്‍ ജൈവകലവറ-പുതിയ സ്റ്റാന്‍ഡ്, സമുദ്ര ആയുര്‍വേദ ഗവേഷണകേന്ദ്രം- മുക്കാളി, പൈതൃക-മീത്തലെ കണ്ണൂക്കര, പി.കെ നാരായണന്‍ നമ്പ്യാര്‍ സ്മാരക ജൈവപ്രകൃതികൃഷിയിടം - 26 കൂത്താളി. ഫോണ്‍ : 9446482110.
വാര്‍ത്താ സമ്മേളനത്തില്‍ ട്രസ്റ്റ് ചെയര്‍മാന്‍ ടി. ശ്രീനിവാസന്‍, വൈസ് ചെയര്‍മാന്‍മാരായ പി.എം വത്സന്‍, വിനോദ് ചെറിയത്ത്, കെ. ഗീത, പി.കെ പ്രകാശന്‍ പങ്കെടുത്തു.